चन्द्रागिरीको आईपीओमा २.४२ गुणा धेरै माग, ७.४२ करोडको पर्यो आवेदन

चन्द्रागिरी हिल्स लिमिटेडको आयोजना प्रभावित क्षेत्रका बासिन्दाका लागि निष्काशन गरेको शेयरमा मंसिर २८ गते आइतबारसम्ममा ७ करोड ४२ लाख रुपैयाँ बढीको शेयर माग भएको छ ।

कम्पनीको शेयर निष्काशन तथा बिक्री प्रबन्धक ग्लोबल आईएमई क्यापिटलका अनुसार मंसिर १७ गतेदेखि निष्काशन खुला भएको कम्पनीको साधारण शेयर (आईपीओ) मा आइतबार साढे ४ बजेसम्ममा २ हजार २८ वटा आवेदबाट ७ करोड ४२ लाख ६८ हजार रुपैयाँ बराबरको ७ लाख ४२ हजार ६८० कित्ता शेयरको माग भएको छ ।

जसमध्ये आश्वा सदस्य बैंक तथा वित्तीय संस्थाबाट १ हजार ७५९ वटा आवेदन मार्फत ६ लाख १० हजार ९४० कित्ता र फारम मार्फत २६९ आवेदन मार्फत १ लाख ३१ हजार ७४० कित्ताको माग परेको हो ।

कम्पनीले पहिलो चरणमा आयोजना प्रभावित स्थानीय बासिन्दाहरुका लागि प्रतिशेयर १०० रुपैयाँका दरले ३ लाख ६ हजार ८१९ कित्ता शेयर निष्काशन गरेको हो । यस आधारमा हेर्दा कम्पनीको शेयरमा मागको तुलनामा २.४२ गुणा बढीको माग परेको हो ।

आईपीओमा पुस १ गतेसम्म आवेदन दिन पाइनेछ । इच्छुक आवेदकले कम्तिमा १० कित्ता देखि अधिकतम ३ हजार ६० कित्तासम्म आवेदन दिन सक्नेछन् ।

कम्पनीले जारी गरेको पहिलो चरणको आईपीओमा आयोजना प्रभावित क्षेत्र काठमाडौं जिल्ला अन्तर्गत चन्द्रागिरी नगरपालिका वडा नंम्बर ३, ४, ६ र ७ साविक थानकोट गाविसाका सम्पूर्ण वडा र साविक महदेवस्थान गाविसको वडा नं. ३, ४, ५, ६, ७, ८, एवं मकवनपुर जिल्लाको थाहा नगरपालिका वडा नं. ९ र १० का नागरिकले मात्र आवेदन दिन पाउनेछन् ।

• सर्वसाधारणमा दोश्रो चरणमा खुल्ने

कम्पनीले पहिलो चरणको शेयर बिक्रीपछि सर्वसाधारणमा दोश्रो चरणमा शेयर बिक्रीमा ल्याउनेछ । दोश्रो चरणमा जारी पूँजीको १० प्रतिशत अर्थात १५ लाख ३४ हजार ९१ कित्ता शेयर सर्वसाधारणका लागि निष्काशन हुनेछ ।

कम्पनीले सर्वसाधारण र स्थानीय बासिन्दाका लागि गरी कुल १८ करोड ४० लाख बराबरको १८ लाख ४० हजार ९१० कित्ता शेयर बिक्रीका लागि धितापत्र बोर्डबाट अनुमति पाएको थियो। आईपीओ जारीपछि कम्पनीको चुक्ता पूँजी १ अर्ब ५३ करोड पुग्नेछ ।

नेपाल उद्योग वाणिज्य महासंघको निर्वाचनमा बरिष्ठ उपाध्यक्ष पदमा निर्वाचित उद्यमी चन्द्र ढकालको प्रमुख लगानी रहेको कम्पनीले काठमाडौँको चन्द्रागिरिमा केबलकार सञ्चालन गरिरहेको छ ।

ऐतिहासिक, साँस्कृतिक तथा प्राकृतिक महत्व बोकेको चन्द्रागिरी डाँडामा यस कम्पनीले भालेश्वर महादेव मन्दिर, सत्तल, भ्यू टावर, चिल्ड्रेन पार्क र सेमिनार हल लगायतका पूर्वाधार निर्माण गरेर चन्द्रागिरी डाँडालाई एकिकृत पर्यटकीय गन्तव्यको रुपमा विकास गरेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।