उपसमुहगत परिसूचकमा खेल्न थाले लगानीकर्ता, बीमा ब्यापार पछि मंगलबार लघुवित्तको पालो

शेयर बजार परिसूचक नेप्से घटेर कारोबार रकममा समेत संकुचित बनेको मंगलबारको बजारमा लगानीकर्ताहरु लघुवित्त कम्पनीको शेयरतर्फ मोडिएका छन् ।

सोमबार बीमा र ब्यापार उपसमूहमा सूचीकृत शेयर उच्च आकर्षण बढ्दा बढ्दो मूल्यमा शेयर उठाएका लगानीकर्ताहरुले मंगलबार लगानीको पहिलोको रोजाइ लघुवित्तलाई बनाएका छन् । जसका कारण मंगलबार उच्च शेयरमूल्य बढ्ने दश कम्पनीको सूचीभित्र आठ लघुवित्त छन् । नेपाल इन्भेष्टमेन्ट बैंक र समस्याग्रस्त संस्थाबाट भर्खरै मुक्ता भएको नारायणी डेभलपमेन्ट बैंकको शेयरमूल्यमा पनि उच्च बढोत्तरी आएको छ ।

हरेक दिन फरक फरक उपसमुहगत समुहमा सूचीकृत कम्पनीहरुको शेयरमा आकर्षण भई मूल्य बढ्न थालेपछि लगानीकर्ताको अनुमान फेल खान थालेको छ । यसले पुराना कारोबारीहरु नै अलमलमा पर्ने अवस्था आएको छ भने नवप्रवेशी लगानीकर्ताहरुलाई स्क्रिप्ट छनौटमा नै कठिनाई हुन थालेको छ । ‘यो सेक्टर बढ्न सक्छ भन्ने आंकलन गरेर सोही समूहका कम्पनीबो शेयरमा लगानी गर्यो भोलिपल्ट अर्कै बढ्छ ।’ पुतलीसडकमा भेटिएका लगानीकर्ता बेदनाथ खनालले भने । पछिल्लो समय बजार वृद्धिमा स्क्रिप्ट छनौट र्था कठिन हुँदै गएको उनको ठम्याई छ ।

हकप्रदको लोभमा यस्तै नारायणी डेभलपमेन्ट बैंक जस्तो खराब बैंकको शेयरमूल्यमा छैटौं कारोबार दिन समेत सकारात्मक सर्किट लागेर कारोबार बन्द भएको छ । ५ दिनमा मात्रै बैंकको शेयरमूल्य २८१ रुपैयाँले बढेको छ । खराब कम्पनीको शेयर उच्च मूल्यमा किन्दा लामो समयसम्म प्रतिफल नपाउने जोखिम एकातिर छदैँछ भने अर्कोतिर शेयरमूल्यमा घट्दा हुने जोखिम पनि उत्तिकै बढेको छ ।

आज कारोबारमा आएको १२ उपसमुहका सूचकमध्ये ३ बाहेक बाँकी ९ वटाको इन्डेक्स ऋणात्मक बनेका छन् । लघुवित्त १.८६ प्रतिशतले बढेको बजारमा जीबन बीमा र बैंकिङ्गको सूचक पनि सामान्य रुपमा सकारात्मक बनेका छन् । आज उत्पादन र ब्यापार २ प्रतिशत धेरै, होटल, विकास बैंक, जलविद्युत, अन्य १ प्रतिशतले घट्दा निर्जीबन बीमा, वित्त, र म्युचुअल फण्डको सूचक पनि सामान्य घटेको छ ।

बजार खुलेदेखि नै सूचकमा दबाबमा रहेको नेप्से केही स्म्हालिन खोजेपनि अल्पकालीन लगानीकर्ताको प्रोफिट बुकिङ्गले उच्च बिक्री चापका कारण अन्त्यमा ५.७५ अंक ऋणात्मक भएर बन्द भएको छ ।

आज २०५ कम्पनीका ९७ लाख ७५ हजार ५४७ कित्ता शेयर ४७ हजार ७६९ पटक खरीद बिक्री हुँदा कारोबार रकम ६ अर्ब ६ करोड ९३ लाख ३१ हजार ६८७ रुपैयाँ पुगेको छ । जुन अघिल्लो दिन सोमबारको तुलनामा १ अर्ब १३ करोड ४८ लाख रुपैयाँ थोरै हो ।

• नेपाल लाइफमा उच्च कारोबार

मंगलबार नेपाल लाइफको सर्वाधिक कारोबार भएको छ । कम्पनीको २ लाख २९ हजार ८२ कित्तत्ता शेयर ५२ करोड ३८ लाख २६ हजार रुपैयाँमा खरीद बिक्री भएको हो ।

दोस्रो ठूलो कारोबार भएको पुनर्बीमा कम्पनीको ३६ करोड ८ लाखको शेयर कारोबारमा आउँदा नेपाल बैंक २२ करोड ६३ लाख, नेशनल लाइफ २० करोड ४० लाख, र नबिल बैंकको २० करोडको कारोबार भएको छ ।

एनआईसी एशिया बैंक, शिखर इन्स्योरेन्स,शिवम् सिमेन्ट, एनटिसी, र हिमालयन डिष्टिलरीको १५ करोड धेरै रुपैयाँ बराबरको शेयर कारोबारमा आएको छ ।

• यी हुन् उच्च शेयरमूल्य बढ्ने कम्पनी

आजको बजारमा उन्नति सहकार्य लघुवित्त, महुली सामुदायिक लघुवित्त, गुराँस लघुवित्त, ग्लोबल आईएमई लघुवित्त, नारायणी डेभलपमेन्ट बैंक, नेशनल माईक्रोफाइनान्सको शेयरमूल्य ९ प्रतिशत धेरैले बढेको छ ।

यसैगरी सूर्योदय लघुवित्त, नेपाल इन्भेष्टमेन्ट बैंक, फरवार्ड लघुवित्त र आरएमडिसी लघुवित्तको पनि शेयरमूल्य बढेको छ । यी कम्पनीको पनि साढे पाँच प्रतिशतभन्दा बढीले बढोत्तरी भएको छ ।

• तीन कम्पनीको शेयरमूल्य ४ प्रतिशत धेरैले घट्यो

आजको बजारमा मल्टिपर्पस फाइनान्स कम्पनी, सिन्धु विकास बैंक, राष्ट्रिय बीमा कम्पनी संस्थापकको शेयरमूल्य ४ प्रतिशत धेरैले घटेको छ ।
यसैगरी सनराइज फस्ट म्युचुअल फण्ड, नेपाल हाइड्रो डेभलोपर कम्पनी, शिखर इन्स्योरेन्स, दीब्यश्वरी हाइड्रोपावर, लक्ष्मी बैंक, शिवम् सिमेन्ट, र विशाल बजार कम्पनीको शेयरमूल्य पनि ३ प्रतिशत बढीले घटेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।