नेप्से करिब ९ अंकले बढेपनि कारोबार भने ८२ करोडले घट्यो

शेयर बजार परिसूचक मापक नेप्से बढेपनि सोमबार कारोबार रकममा भने आइतबारको तुलनामा ८२ करोड रुपैयाँले गिरावट आएको छ ।

कारोबारको सुरुवातदेखि नै उच्च बिक्रीचापका बाबजुत बजार वृद्धिका लागि प्रयासरत रहेकोमा अन्तत झण्डै दोहोरो अंकले नेप्से भने बढेर बन्द भएको छ ।

सोमबार नेप्से सूचक ८.५७ अंकले बढेर २ हजार ७ दशमलव २९ बिन्दुमा बन्द भएको छ । ठूला कम्पनीहरुको सूचक मापक सेन्सेटिभ इन्डेक्स १.१४ अंकले बढेर ३८२ दशमलव ५७ बिन्दुमा पुगेको छ । आज २१४ कम्पनीका ७४ लाख ९७ हजार २८४ कित्ता शेयर ३ अर्ब ८५ करोड ३ लाख २० हजार ४५ रुपैयाँमा खरीद बिक्री भएका छन् । हिजो आइतबार ४ अर्ब ६६ करोड ९३ लाख रुपैयाँको शेयर कारोबार भएको थियो।

कारोबारमा आएका ९४ कम्पनीको शेयरमूल्य बढेको छ भने ८३ कम्पनीको शेयरमूल्य घटेको छ । ३५ कम्पनीको शेयरमूल्य स्थीर रह्यो । कारोबारमा आएका १२ उपसमुहका सूचकमध्ये ब्यापार सूचतकमा सबैभन्दा धेरै २.४६ प्रतिशतलको गिरावट देखिँदा विकास बैंक र अन्यको सूचक पनि सामान्य घटेको छ ।

बैंकिङ्ग, होटल, जलविद्युत, वित्त, निर्जीबन बीमा, उत्पादमुलक, लघुवित्त, जीबन बीमा र म्युचुअल फण्डको सूचक सामान्य सकारात्मक भएका छन् । सबै सूचक १ प्रतिशतभन्दा कम मात्र बढेका छन् ।

• नेपाल लाइफको उच्च कारोबार

सोमबारको बजारमा नेपाल लाइफको उच्च कारोबार भएको छ । कम्पनीको ३४ करोड ९१ लख ८० हजार रुपैयाँको शेयर कारोबार हुँदा १ लाख ५६ हजार ९८१ कित्ता शेयर खरीद बिक्री भएको छ ।

म्ंगलबार हकप्रदका लागि बुकक्लोज तोकेको नागरिक लगानी कोषको  हकप्रद पाउने आशामा शेयर खरीकर्ता बढेपछि सोमबार दोस्रो ठूलो (३२ करोड ३५ लाखको) कारोबार भएको छ । एनआईसी एशिया ३० करोड ६ लाख, नबिल बैंक २४ करोड ३४ लाख र शिवम् सिमेन्टस्को २१ करोड १७ लाख रुपैयाँको शेयर खरीद बिक्री भएको छ ।

एनसीसी बैंक, ग्लोबल आईएमई बैंक, नेपाल पुनर्बीमा कम्पनी, प्रभु र प्राइम कमर्सियल बैंक शीर्ष कारोबार हुने दश कम्पनीमा सामेल भएका छन् ।

• नारायणी डेभलपमेन्ट बैंकको शेयरमूल्यमा सकारात्मक सर्किट

समस्याग्रस्त संस्थाबाट मुक्त भई हकप्रदबाट पूँजी वृद्धि गर्न लागेको नारायणी डेभलपमेन्ट बैंकको शेयरमूल्यमा सोमबार सकारात्मक सर्किट लागेको छ । यस्तै सोमबार नै १० प्रतिशत लाभांश घोषणा गरेको सेन्ट्रल फाइनान्सको शेयरमूल्य पनि ९.६२ प्रतिशतले बढेको छ ।

यसैगरी राधी विद्युत कम्पनी, एनसीसी बैंक, आइएमई जनरल इन्स्योरेन्स, र एनआईसी एशिया बैंकको शेयरमूल्य ५ प्रतिशत बढीले वृद्धि हुँदा नेपाल ल्यूब आयल, शिवम् सिमेन्टस्, प्रभु बैंक र फरर्वाड कम्युनिटी लघुवित्त शीर्ष शेयरमूल्य दश कम्पनीभित्र परेका छन्।

• सिद्धार्थ बैंकको डिबेञ्चरको मूल्य धेरै घट्यो

सोमबार सिद्धार्थ बैंक डिबेञ्चर ‘एसबिएल डिबेञ्चर २०८२’ को इकाईमूल्य मूल्य सबैभन्दा धेरै ७.६० प्रतिशतले घटेको छ ।

समीट लघुवित्त, समृद्धि फाइनान्स, एनएमबि ५०, साल्ट ट्रेडिङ्ग कर्पोरेसन, सानिमा माइ हाइड्रोपावर, जोशी हाइड्रोपावर, सबैको लघुवित्त, सिटिजन्स म्युचुअल फण्ड १ र एचआईडिसीएलको इकाईमूल्य घटेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।