नेप्से साढे ५ अंकले सकारात्मक, उत्पादन र अन्य सूचक चम्किए

शेयर बजार परिसूचक मापक नेप्से मंगलबार ५.५७ अंकले सकारात्मक भएर बन्द भएपनि ठूला कम्पनीहरुको सूचक माप सेन्सेटिभ इन्डेक्स भने ऋणात्मक बनेको छ । बैंकिङ्ग सहित ठूला पूँजीकरण भएका कम्पनीहरुको शेयर बढ्न नसक्दा सेन्सेटिभ ०.१३ अंकले घटेर ३८२.४४ बिन्दुमा बन्द भएको छ ।

ऋणात्मक बजारमा पनि उत्पादनमूलक तथा अन्य उपसमूहका सूचक भने चम्किएका छन् । उत्पादनमुलक उपसमुहमा सूचीकृत हिमालयन डिष्टिलरी र शिवम् सिमेन्ट तथा मंगलबार नै हकप्रद शेयरमा शेयरमूल्य समायोजन भएको अन्य उपसमूहमा सूचीकृत नागरिक लगानी कोषको शेयरमूल्य उच्च रुपमा बढेपछि दुबै उपसमुहका सूचक उच्च रुपमा बढेका हुन् ।

कारोबारमा आएका बाह्र उपसमुहका सूचकमध्ये उत्पादन ४ प्रतिशत र अन्य सूचक ३.२९ प्रतिशतले वृद्धि भएको छ । लघुवित्त र निर्जीबन बीमा पनि सामान्य सकारात्मक भएका छन् ।

जलविद्युतको सूचक १.१८ प्रतिशतले घटेको बजारमा बैंकिङ्ग, ब्यापार, होटल, विकास बैंक, वित्त, जीबन बीमा कम्पनी, म्युचुअल फण्डको सूचक पनि ऋणात्मक भएको छ ।

मंगलबार नेप्से सूचक ५.५७ अंकले बढेर २ हजार १२ दशमलव ८९ बिन्दुमा बन्द भएको छ । आज २०९ कम्पनीका ८० लाख १ हजार ३१४ कित्ता शेयर खरीद बिक्री भएको छ । ३७ हजार ९१६ पटकको कारोबारबाट ४ अर्ब ९ करोड २२ लाख २७ हजार ८०२ रुपैयाँको कारोबार भएको छ । सोमबारको तुलनामा कारोबार रकम २४ करोडले बढेको हो । सोमबार ३ अर्ब ८५ करोड ३ लाख रुपैयाँको शेयर खरीद बिक्री भएको थियो ।

कारोबारमा आएका ७४ कम्पनीको शेयरमूल्य बढेको छ भने १०७ कम्पनीको शेयरमूल्य घटेको छ । २८ कम्पनीको शेयरमूल्य स्थीर रह्यो ।

• नबिल बैंकको उच्च कारोबार

सोमबारको बजारमा नबिल बैंकको उच्च कारोबार भएको छ । बैंकको ५३ करोड १ लाख ७७ हजार रुपैयाँको शेयर कारोबार हुँदा ३ लाख ८१ हजार ८९५ कित्ता शेयर खरीद बिक्री भएको छ । बुधबार बोनसको बुकक्लोज तोकेको बैंकका लगानीकर्ताले बोनस पाउने आशामा शेयर खरीकर्ता बढेपछि उच्च कारोबार भएको हो ।

यसैगरी शिवम् सिमेन्टस्को २७ करोड ९३ लाख, ग्लोबल आईएमई बैंकको २३ करोड ५० लाख र हिमालयन डिष्टिलरी २० करोड ८ लाखको शेयर खरीद बिक्री भएको छ ।

नेपाल लाइफ, नेपाल पुनर्बीमा कम्पनी, एनआईसी एशिया बैंक, नेशनल लाइफ, हिमालयन जनरल इन्स्योरेन्स कम्पनी, र एनटिसीको शीर्ष दश ठूलो कारोबार भएको छ ।

• सिआईटी र नारायणी डेभलपमेन्ट बैंकको शेयरमूल्यमा सकारात्मक सर्किट

मंगलबार नै हकप्रदमा शेयरमूल्य समायोजन भएको नागरिक लगानी कोष (सीईआटी) र समस्याग्रस्त संस्थाबाट मुक्त भई हकप्रदबाट पूँजी वृद्धि गर्न लागेको नारायणी डेभलपमेन्ट बैंकको शेयरमूल्यमा मंगलबार सकारात्मक सर्किट लागेको छ ।

यस्तै हिमालयन जनरल इन्स्योरेन्स कम्पनी र शिवम् सिमेन्टसको शेयरमूल्य ५ प्रतिशत धेरैले बढेको छ । हिमालयन डिष्टिलरी, ‘एसबिएल डिबेञ्चर २०८२’ को इकाईमूल्य, आशा लघुवित्त, नाडेप लघुवित्त, ग्लोबल आईएमई र सबैको लघुवित्तको शेयरमूल्य शेयरमूल्य २ प्रतिशत धेरैले बढेको छ ।

• मल्टिपपर्स फाइनान्सको मूल्य धेरै घट्यो

मंगलबार मल्टिपपर्स फाइनान्सको मूल्य मूल्य सबैभन्दा धेरै ६ प्रतिशतले घटेको छ ।

सेन्ट्रल फाइनान्सको शेयरमूल्य ४.०९ प्रतिशत, मितेरी डेभलपमेन्ट बैंक, युनाइटेड इदिमर्दी आरबि हाइड्रोपावर, एभरेष्ट इन्स्योरेन्स संस्थापक, राधी विद्युत कम्पनी, ग्रीन डेभलपमेन्ट बैंक, नेपाल क्रेडिट एण्ड कमर्स बैंक, सानिमा माई र सूर्योदय लघुवित्तको शेयरमूल्य ३ प्रतिशत बढीले घटेका छन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।