निफ्राको आईपीओमा मेरो शेयर मार्फत मात्रै पर्यो सवा १२ लाख आवेदन

नेपाल इन्फ्रास्ट्रक्चर बैंक (निफ्रा) को साधारण शेयर (आईपीओ) मा मेरो शेयरको वेवसाइट तथा एप मार्फत बाट मात्रै १२ लाख १७ हजार बढी आवेदन परेको छ । बैंकमा अन्तिम दिन मंगलबार साँझ सवा ६ बजेसम्ममा कुल १५ लाख २९ हजार ४६० वटा आवेदन परेकोमध्ये ८० प्रतिशत आवेदन मेरो शेयर मार्फत परेको हो ।

यसअघिको आईपीओमा करिब ९० प्रतिशत हाराहारीमा मेरो शेयर मार्फत आवेदन पर्ने गरेकोमा निफ्राको आईपीओमा भने मेरो शेयरको आवेदन घटेको हो ।

बैंकको शेयरमा उपत्यका बाहिरबाट समेत प्रयाप्त माग पर्दा बैंक तथा वित्तीय संस्थाको सि-आश्वा प्रणालीबाट पनि २० प्रतिशत आवेदन परेको हो ।

अन्तिम दिन मंगलबार साँझ ६ बजेसम्ममा कम्पनीको शेयरमा १५ लाख २९ हजार ४६० आवेदनबाट २.३९ गुणा धेरै कित्ता शेयर माग भएको छ । ७ अर्ब ५८ करोडको आईपीओमा १८ अर्ब १२ करोड ८६ लाख ७२ हजार रुपैयाँ बराबरको १८ करोड १२ लाख ८६ हजार ७२० कित्ता आवेदन परेको हो । बैंक तथा वित्तीय संस्थाको सि आश्वा प्रणालीबाट अझै आवेदन आउने क्रम रहेकाले आवेदन संख्या अझै बढ्ने जनाइएको छ ।

बैंकको अधिकृत पूँजी ४० अर्ब र संस्थापकहरुबाट चुक्ता पूँजी १२ अर्ब छ । सर्वसाधारणहरुलाई शेयर निष्काशनपछि बैंकको चुक्ता पूँजी २० अर्ब रुपैयाँ पुग्नेछ । नेपाल सरकारको समेत लगानी रहेको बैंक नेपालकै पहिलो पूर्वाधार विकास बैंक हो ।

• इन्फ्रास्ट्रक्चर बैंकको आईपीओ अवधिमा मात्र खुले १ लाख डिम्याट खाता

• नेपाल इन्फ्रास्ट्रक्चर बैंकको आईपीओमा सवा १५ लाखले गरे आवेदन, २.३९ गुणा धेरै शेयर माग

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।