खुद ब्याज आम्दानी घटेको छिमेक लघुवित्तले २८ प्रतिशतले बढायो नाफा

छिमेक लघुवित्त वित्तीय संस्था (CBBL) ले चालु आर्थिक वर्षको दोस्रो त्रैमाससम्ममा गत आवको यसै अवधिको तुलनामा २७.७९ प्रतिशत अर्थात १३ करोड ३८ लाख रुपैयाँले खुद नाफा बढाएको छ ।

लघुवित्तले चालु आवको ६ महिनामा ६१ करोड ५४ लाख ९४ हजार रुपैयाँ खुद नाफा आर्जन गरेको छ ।

गत आवको यसै अवधिमा लघुवित्तले ४८ करोड १६ लाख ३५ हजार रुपैयाँ खुद नाफा कमाएकोमा १३ करोड ३८ लाख रुपैयाँले खुद नाफा बढेको हो ।

खुद ब्याज आम्दानीमा गिरावट आएपनि शुल्क कमिशन आयमा वृद्धि तथा सम्भावित कर्जा जोखिम नोक्सानी असुली (राइट ब्याक) गरेपछि छिमेकको खुद नाफामा वृद्धि भएको हो ।

लघुवित्तले पुससम्ममा ९८ करोड ४१ लाख १० हजार रुपैयाँ खुद ब्याज आम्दानी कमाएको छ । गत आवको यसै अवधिमा भने ९८ करोड ७६ लाख ९४ हजार रुपैयाँ थियो । समीक्षा अवधिमा खुद ब्याज आम्दानी ३५ लाख रुपैयाँले घटेको हो । 

यस अवधिमा लघुवित्तले ८२ करोड ३२ लाख ८९ हजार रुपैयाँ सञ्चालन नाफा कमाएको छ । जुन गत आवको यसै बेलाको भन्दा ७ करोड ७७ लाख रुपैयाँ धेरै हो । पुस मसान्तसम्म लघुवित्तले १५ करोड ३६ लाख ८५ हजार रुपैयाँ सम्भावित कर्जा जोखिम नोक्सानी असुली गरेपछि खुद नाफामा वृद्धि भएको हो ।

पुस मसान्तसम्ममा लघुवित्तले २० अर्ब ८६ करोड रुपैयाँ निक्षेप र ६ अर्ब १२ करोड रुपैयाँ सापटीबाट २५ अर्ब २९ करोड रुपैयाँ कर्जा लगानी गरेको छ ।

चुक्ता पूँजी १ अर्ब ८३ करोड रुपैयाँ रहेको छिमेकको प्रतिशेयर आम्दानी ६७.२७ रुपैयाँ, प्रतिशेयर नेटवर्थ २४२.८९ रुपैयाँ र मूल्य आम्दानी अनुपात १८.९७ गुणा छ । लघुवित्तको जगेडा कोषमा २ अर्ब ६१ करोड ४८ लाख ३१ हजार रुपैयाँ छ ।

पुस मसान्तसम्ममा लघुवित्तको निष्क्रिय कर्जा अनुपात बढेर २.१३ प्रतिशत पुगेको छ । यस्तै निक्षेप संकलन लागत ७.६७ प्रतिशत छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।