आमहड्ताल घोषणापछि नेप्से धरमरायो, बिक्री चापले दोस्रो ठूलो कारोबार

सत्तारुढ दल नेकपा विभाजनको असर शेयर बजारमा देखिएको छ । नेकपाबाट विभाजित प्रचण्ड-माधव समुहले बिहीबार आमहड्ताल गर्ने सूचना प्रवाहित भएपछि बुधबार सुरुवातदेखि नै ओरोलो लाग्न थालेको नेप्से ६.८१ अंकले घटेर बन्द भएको छ ।

दिउँसो २ बजे आमहड्ताल घोषणा गर्ने समय सार्वजनिक भएसँगै बुधबार सोही बेला नेप्से दिनभरिकै न्यूनतम बिन्दु २४५८ बिन्दुसम्म झरेकोमा बजार बन्द हुँदासम्म न्यूनतम बिन्दुभन्दा ८ अंकले बढेर बन्द भएको हो ।

प्रतिनिधिसभाको असंवैधानिक विघटन र संवैधानिक नियकामा सिफारिस गरिएकाहरुलाई शपथ ग्रहण गराएर सरकारले काममा खटाएपछि नेकपाको दाहाल नेपाल समूहले तेस्रो चरणको आन्दोलनका कार्यक्रमहरु सार्वजनिक गरेको हो । सो समुहले पुर्व निर्धारित कार्यक्रमलाई परिमार्जन गरेर बिहीबार आमहड्ताल र माघ २८ गते राजधानीमा बृहत प्रदर्शन गर्ने घोषणा गरेको छ ।

आज २०२ कम्पनीका २ करोड २० लाख ४० हजार ५१६ कित्ता शेयर ९१ ह्जार ५५९ पटक खरीद बिक्री हुँदा ९ अर्ब ५३ करोड १७ लाख १६ हजार ४९६ रुपैयाँ बराबरको कराोबार भएको छ । यो रकम नेप्सेमा हालसम्म भएको दोस्रो ठूलो कारोबार हो । यसअघि माघ १५ गते बिहीबार एकैदिन ८ अर्ब ८९ करोड बढीको शेयर कारोबारमा आएको थियो ।

नेप्से उच्चतम अंकमा पुगेको बखत आन्दोलनको घोषणापछि नाफा सुरक्षित गर्नेहरु सक्रिय हुँदा शेयर बजारमा बुधबार दोस्रो ठूलो कारोबार भएको हो ।

यसदिन जलविद्युत, बैंकिङ्ग, लघुवित्त र म्युचुअल फण्ड बाहेक बाँकी ८ वटा उपसमुहको सूचक ऋणात्मक बनेका छन् । ब्यापार २.२१ प्रतिशतले घटेको बजारमा होटल, वित्त, उत्पादन, जीवन बीमाको सूचक पनि १ प्रतिशतभन्दा धेरैले ऋणात्मक रह्यो ।

• ग्लोबल आइएमई बैंकको उच्च कारोबार

बुधबार को बजारमा ग्लोबल आइएमई बैंकको सर्वाधिक कारोबार भएको छ । यसदिन बैंकको १३ लाख ९१ हजार ६०० कित्ता शेयर ५६ करोड १९ लाख २६ हजार रुपैयाँमा खरीद बिक्री भएको छ ।

यसैगरी पुनर्बीमा कम्पनीको ३२ करोड ७० लाख ८१ हजार, अरुण काबेलीको ३० करोड ४८ लाख २२ हजार, र नेपाल टेलिकको ३० करोड ७ लाख ४२ हजार रुपैयाँको शेयर कारोबार भयो ।

नेपाल बैंक, नेपाल लाइफ, शिखर इन्स्योरेन्स, सेञ्चुरी कमर्सियल बैंक, प्रभु लाइफ र रिmायन्स लाइफ इन्स्योरेन्स शीर्ष ठूलो कारोबार गर्ने दश कम्पनीभित्र समेटिएका छन् । दशौं ठूलो कारोबार भएको रिलायन्सको १७ करोड ४८ लाख बढीको शेयर खरीद बिक्री भएको छ ।

• चार लघुवित्तको शेयरमूल्यमा सकारात्मक सर्किट

यसदिन स्वाभिमान लघुवित्त, जनउत्थान सामुदायिक, उन्नति सहकार्य, र महुली लघुवित्तको शेयरमूल्यमा सकारात्मक सर्किट लागेको छ ।

यस्तै अरुण काबेली, जनरल इन्स्योरेन्स, सानिमा माइ हाइड्रो, राधी विद्युत कम्पनी, ग्लोबल आइएमई बैंक र सर्पोट लघुवित्तको शेयरमूल्य बढेको छ । दशौं धेरै शेयरमूल्य बढढेको सपोर्ट लघुवित्तको ४.९७ प्रतिशतले मूल्य बढेको छ ।

• पोखरा फाइनान्सका लगानीकर्ताले धेरै गुमाए

बुधबारको बजारमा पोखरा फाइनान्सका लगानीकर्ताले सबैभन्दा धेरै गुमाएका छन् । फाइनान्सको शेयरमूल्य ७.८८ प्रतिशतले घटेर २६९ रुपैयाँमा झरेको हो ।

यस्तै नारायणी डेभलपमेन्ट बैंक, मल्टिपर्पस, प्रोगेशिभ फाइनान्स, युनाइटेड मोदी हाइड्रोपावर, हिमालयन जनरल, लक्ष्मी लघुवित्त, एनसीसी बैंक, पुनर्बीमा कम्पनी र गुडविल फाइनान्सको शेयरमूल्य घटेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।