नेपाल स्पोर्टस समिट २०२६ को घोषणा, नेपाललाई विश्व स्तरीय खेल केन्द्रको रुपमा स्थापित गर्ने

काठमाडौँ । नेपाल स्पोर्टस समिट कमिटीले नेपाल स्पोट्र्स समिट २०२६ (एनएसएस २०२६) को औपचारिक घोषणा गरेको छ । समिट आगामी फेब्रुअरी ५ मा सोल्टी होटलमा आयोजना हुने लागेको हो ।

यो नेपालकै पहिलो संरचित राष्ट्रिय खेल सम्मेलन मञ्च रहेको आयोजनकले जनाएको छ । जसले कूटनीतिज्ञ, अन्तर्राष्ट्रिय प्रतिनिधि, कर्पोरेट नेतृत्व, सरकारी अधिकारी, खेल प्रशासक, सञ्चारकर्मी तथा विश्वव्यापी सरोकारवालाहरूलाई एउटै स्थानमा एकत्रित गर्ने समेत जनाएको छ ।

समिटमा नेपालको खेल क्षेत्रसँग सम्बन्धित नीति, पूर्वाधार, सञ्चार, डिजिटल सामग्री र अन्तर्राष्ट्रिय सहकार्यका विषयहरुमा केन्द्रित पाँच उच्चस्तरीय प्यानल छलफल सत्र सञ्चालन गरिनेछ ।

यी सत्रहरूमा खेल कूटनीति, खेल पूर्वाधार विकास, उदीयमान खेलहरूको विकास, खेल सञ्चार तथा प्रसारणको भूमिका र डिजिटल खेल सामग्री तथा इन्फ्लुएन्सरमार्फत खेल कथावाचनको शक्तिजस्ता विषयहरू समेटिनेछन् । प्रत्येक सत्रका प्यानलिस्टहरूको नाम क्रमशः नेपाल स्पोर्टस समिटका आधिकारिक सामाजिक सञ्जाल र प्रेस विज्ञप्तिमार्फत सार्वजनिक गरिने आयोजकले जनाएको छ ।

‘नेपाल स्पोट्र्स समिट २०२६ केवल एउटा कार्यक्रम नभई खेल, कूटनीति, पर्यटन र आर्थिक विकासलाई एकीकृत गर्ने राष्ट्रिय अभियान हो ।’ समिटका आयोजक आमिर अख्तरले भने, ‘समिटको उद्देश्य नेपालको खेल इकोसिस्टमलाई विश्वव्यापी अवसरहरूसँग जोड्दै अन्तर्राष्ट्रिय सहकार्यमार्फत देशको खेल भविष्यलाई रूपान्तरण गर्नु हो ।’