तारागाउँ रिजेन्सी होटलको साधारण सभा भोलि, भर्चुअल माध्यमबाट ११ बजे आह्वान

तारागाउँ रिजेन्सी होटल (TRH) ले फागुन १४ गते शुक्रबार बिहान ११ बजे भर्चुअल माध्यमबाट २४ औं वार्षिक साधारण सभा आह्वान गरेको छ ।

कोरोना भाइरस संक्रमणका कारण होटलले आफ्नो रजिष्टर्ड कार्यालय बौद्ध काठमाडौंमा सीमित व्यक्तिको उपस्थितीमा बाँकी शेयरधनीहरुलाई भर्चुअल माध्यमबाट सभा गर्ने जनाएको छ ।

सभाले सञ्चालक समितिले गत आवको नाफाबाट प्रस्ताव गरेको लाभांश पारित गर्नेछ । कम्पनीले आर्थिक वर्ष २०७६।७७ मुनाफाबाट चुक्ता पूँजीको १० प्रतिशत (५ प्रतिशत कर समेत) नगद लाभांश वितरण गर्ने प्रस्ताव गरेको छ ।

होटलले हाल कायम चुक्ता पूँजी एक अर्ब ८८ करोड रुपैयाँको १० प्रतिशतले हुन आउने १८ करोड ८६ लाख रुपैयाँ कर सहित नगद लाभांश वितरण गर्ने प्रस्ताव साधारण सभाबाट अनुमोदन गराउनेछ ।

सभाले सञ्चालक समितिमा समुह ‘ग’ बाट प्रतिनिधित्व गर्नेगरी १ जना सञ्चालक नियुक्त गर्नेछ ।

साधारण सभा तथा लाभांश वितरण प्रयोजनको लागि कम्पनीले माघ ३० गतेदेखि फागुन १४ गतेसम्म बुकक्लोज गरेको छ । यसअनुसार, माघ २९ गतेसम्म नेप्सेमा कारोबार भई कायम शेयरधनीहरुले मात्र सो सभामा भाग लिन तथा लाभांश प्राप्त गर्न सक्नेछन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।