मालपोत कार्यालय जुम्लाद्वारा एक करोड ८६ लाखभन्दा बढी राजस्व सङ्कलन

जुम्ला । मालपोत कार्यालयले चालु आर्थिक वर्ष २०८२/८३ को आठ महिनामा एक करोड ८६ लाख ७२ हजार रुपैयाँ राजस्व सङ्कलन गरेको छ । कार्यालयले साउनदेखि फागनु मसान्तसम्ममा विभिन्न शीर्षकमा उक्त परिमाणमा राजस्व सङ्कलन गरेको जनाएको हो ।

कार्यालय प्रमुख मोहनबहादुर विष्टले सबैभन्दा धेरै घरजग्गा लिखत रजिष्ट्रेसन शुल्कबाट एक करोड २६ लाख २३ हजार ७७७ रुपैयाँ राजस्व सङ्कलन भएको जानकारी दिए । यसैगरी पुँजीगत लाभकरतर्फ ५७ लाख ३४ हजार ५३६ रुपैयाँ र विविधतर्फ तीन लाख १३ हजार ८६९ रुपैयाँ राजस्व सङ्कलन भएको उनले बताए ।

राजस्व रकममध्ये पुँजीगत लाभकर सङ्घीय सरकारमा पठाउने प्रावधान छ । त्यसबाहेक पुर्जा धितो, रोक्का, संशोधन, घर कायम, नामसारी विलम्ब शुल्कलगायत शीर्षकको राजस्व रकम प्रदेश सरकारमा पठाउने प्रावधान रहेको कार्यालय प्रमुख विष्टले बताए । सङ्कलित राजस्वमध्ये रजिष्ट्रेसन शुल्कअन्तर्गतको कुल रकमको ४० प्रतिशत प्रदेश सरकारलाई र ६० प्रतिशत सम्बन्धित स्थानीय सरकारलाई पठाउने प्रावधान रहेको छ ।

यहाँ गत आर्वमा विभिन्न राजस्व शीर्षकअन्तर्गत दुई करोड ४० रुपैयाँ राजस्व सङ्कलन भएको थियो । त्यसमध्ये घरजग्गा रजिष्ट्रेसन दस्तुरबाट एक करोड ४२ लाख २३ हजार रुपैयाँ, सेवा शुल्कबाट ९८ लाख २४ हजार रुपैयाँ, गुठीबाट उठेको राजस्व तीन लाख ६४ हजार रुपैयाँ र पुँजीगत लाभकरतर्फ ८४ लाख २९ हजार रुपैयाँ रहेको थियो । रासस