तीस करोड २८ लाख राजस्व छली गर्ने दुई फर्मका संचालक विरुद्ध मुद्दा दर्ता

झुट्टा तथा नक्कली मू.अ.कर प्रयोग गरी राजस्व छली गर्ने न्यु राहुल मोवाइल सेन्टर समेतका दुई वटा फर्महरु विरुद्ध ३० करोड २८ लाख दुई हजार ५ सय ५३ रुपैयाँ विगो कायम गरी मुद्दा दर्ता भएको छ ।

राजश्व अनुसन्धान विभागले उक्त फर्महरुका कारोवार संचालक/प्रोप्राईटर तथा बैक खाता संचालकहरुलाई जरिवाना र कैद मागदावी लिई चैत २५ र २६ गते उच्च अदालत जनकपुर,अस्थायी इजलास विरगंज र उच्च अदालत पाटन, हेटौडा इजलासमा मुद्दा दर्ता गराएको हो ।

झुट्टा तथा नक्कली मू.अ.कर विजक प्रयोग गरी राजस्व छली गर्ने मकवानपुर जिल्ला, हेटौडा उपमहानगरपालिका वडा नं. ६ बस्ने न्यु राहुल मोवाईल सेन्टर हेटौडा प्रोप्राईटर काजल केशरी समेतबाट १२ करोड ३५ लाख २५ हजार २२ रुपैया विगो असुल गरी जरिवाना र कैद मागदावी उच्च अदालत पाटन, हेटौडा इजलासमा मुद्दा दर्ता गराएको हो ।

त्यस्तै विरगंज महानगरपालिका वडा नं. १२ रानिघाट भएका ब्याहुत ट्रेडर्स विरगंजका प्रोप्राइटर अनिल कुमार कलवारबाट १७ करोड ९२ लाख ७७ हजार ५५१ रुपैयाँ विगो असुल गरी जरिवाना र कैद मागदावी लिई उच्च अदालत जनकपुर,अस्थायी इजलास विरगंजमा मुद्दा दर्ता गरिएको विभागले जनाएको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।