निर्जीवन बीमा कम्पनीको खुद नाफा साढे ३ अर्ब, तीन कम्पनीको घट्यो

निर्जीवन बीमा कम्पनीले चालु आर्थिक वर्षको तेस्रो त्रैमाससम्ममा साढे ३ अर्ब खुद नाफा कमाएका छन् । समीक्षा अवधिमा निर्जीवन बीमा कम्पनीहरुको नाफा ९.६४ प्रतिशतले बढेको छ । 

सञ्चालनमा रहेका १९ निर्जीवन बीमा कम्पनीले चालु आवको तेस्रो त्रैमासको अवधिसम्ममा ३ अर्ब ४५ करोड १९ लाख रुपैयाँ खुद नाफा आर्जन गरेका हुन् । गत आवको यसै अवधिमा कम्पनीहरुले ३ अर्ब १४ करोड ८५ लाख रुपैयाँ खुद नाफा कमाएका थिए ।

सञ्चालनमा रहेका २० निर्जीवन बीमा कम्पनीमध्ये नेशनल इन्स्योरेन्सले भने तेस्रो त्रैमासको वित्तीय विवरण सार्वजनिक गरेको छैन ।

यस अवधिमा १९ कम्पनीमध्ये १६ कम्पनीको नाफा बढेको छ भने तीन कम्पनीको नाफामा गिरावट आएको छ । हिमालयन जनरल, दि ओरियन्टल इन्स्योरेन्स र राष्ट्रिय बीमा कम्पनीको नाफामा गिरावट आएको हो ।

यस अवधिमा युनाइटेड इन्स्योरेन्सको खुद नाफा सबैभन्दा धेरै ३३५ प्रतिशतले बढेको छ भने जनरल र सानिमा जनर इन्स्योरेन्सले पनि गत आवको तेस्रो त्रैमासको तुलनामा शतप्रतिशत धेरेले नाफा बढाएका छन् ।

शिखरले सबैभन्दा धेरै ३६ करोड ३३ लाख २० हजार नाफा कमाएको छ । कम्पनीको नाफा १ प्रतिशतभन्दा कम बढेको हो ।

समीक्षा अवधिमा राष्ट्रिय बीमा कम्पनीको ४९.४७ प्रतिशत, दि ओरियण्टलको ३२.५७ र हिमालयन जनरलको १९.१३ प्रतिशतले नाफा घटेको हो । गत आवको यसै अवधिमा ५३ करोड ४३ लाख रुपैयाँ खुद नाफा कमाएको राष्ट्रिय बीमा कम्पनीको नाफा चालु आवको सोही अवधिमा २७ करोड रुपैयाँमा सीमित भएको हो ।

गत आवको तेस्रो त्रैमासमा ३७ करोड २५ लाख नाफा कमाएको ओरियण्टलले चालु आवको तेस्रो त्रैमासमा २५ करोड १२ लाख रुपैयाँ कमाएको छ । ११ करोड २५ लाख नाफा कमाएको हिमालयन जनरलको खुद नाफा ९ करोड रुपैयाँमा सिमित भएको छ ।

समीक्षा अवधिमा शिखर इन्स्योरेन्सले सबैभन्दा धेरै नाफा आर्जन गरेको छ । यस अवधिमा कम्पनीले ३६ करोड ३३ लाख रुपैयाँ खुद नाफा कमाएको हो । शिखर पछि नेको इन्स्योरेन्सले ३५ करोड ९ लाख रुपैयाँ र प्रिमियर इन्स्योरेन्सले २८ करोड ९६ लाख रुपैयाँ खुद नाफा कमाएका छन् ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।