बीमा कम्पनीद्धारा दश महिनामा १.२३ खर्ब बीमाशुल्क संकलन

सञ्चालनमा रहेका ४० बीमा कम्पनीले चालु आवको दश महिना अवधिमा १ खर्ब २३ अर्ब ५१ करोड रुपैयाँ बीमाशुल्क संकलन गरेका छन् ।

बीमा समितिले उपलब्ध गराएको वैशाख मसान्तसम्मको तथ्यांक अनुसार राष्ट्रिय बीमा कम्पनी बाहेक ३८ बीमा कम्पनीले कुल एक खर्ब २३ अर्ब ५१ करोड रूपैयाँ बीमाशुल्क आर्जन गरेका हुन् ।

बीमा समितिका अनुसार चालु आर्थिक वर्षको १० महिनामा जीवन बीमा कम्पनीहरुले प्रिमियम बापत कुल ९८ अर्ब ८९ करोड लाख रुपैयाँ संकलन गरेका छन् । यस्तै निर्जीवन बीमातर्फ कुल २४ अर्ब ६२ करोड रुपैयाँ संकलन भएको छ ।

वैशाख महिनामा मात्रै जीवन बीमा कम्पनीहरुले ५ अर्ब २० करोड र निर्जीवन बीमा कम्पनीहरुले १ अर्ब ७२ करोड रुपैयाँ गरी कुल ६ अर्ब ९२ करोड रुपैयाँ बीमा शुल्क संकलन गरेका छन् ।

जीवन बीमा अन्तर्गत नेपाल लाइफले सबैभन्दा धेरै २६ अर्ब ८४ करोड बीमाशुल्क आर्जन गरेको छ भने निर्जीवन बीमातर्फ शिखर इन्स्योरेन्सले ३ अर्ब १९ करोड रुपैयाँ बीमाशुल्क आर्जन गरेको छ । नेपाल लाइफले बैशाखमा १ अर्ब ४७ करोड र शिखरले २३ करोड रुपैयाँ बीमाशुलक संकलन गरेको छ ।

जीवन बीमा कम्पनीतर्फ नेपाल लाइफपछि धेरै बीमाशुल्क आर्जन गर्ने कम्पनीमा एलआइसी नेपाल रहेको छ । कम्पनीले यस अवधिसम्मा १४ अर्ब २८ करोड रुपैयाँ कुल बीमाशुल्क संकलन गरेको छ ।

त्यस्तै, नेपाल लाइफ र एलआइसी पछि बढी बीमा शुल्क उठाउने कम्पनीमा नेशनल लाइफ, राष्ट्रिय बीमा संस्थान, युनियन लाइफ, एशियन र मेट लाइफ परेका छन् । नेशनल लाइफले ९ अर्ब २६ करोड, राष्ट्रिय बीमा सस्थानले ७ अर्ब १८ करोड, युनियन लाइफले ५ अर्ब ४१ करोड, एशियन लाइफले ४ अर्ब ९० करोड, मेट लाईफले ४ अर्ब ३६ करोड, सुर्याले ३ अर्ब ४१ करोड, प्राईमले ३ अर्ब २७ करोड रुपैयाँ बीमाशुल्क संकलन गरेका छन् ।

यसैगरी निर्जीवन बीमा कम्पनीतर्फ शिखरपछि सगरमाथा, नेको, सगरमाथा, सिद्धार्थ, प्रभु, नेपाल, प्रिमियर, लुम्बिनी, एनएलजी, आईएम जनरल, प्रुडेन्सियल र अजोड इन्स्योरेन्सले एक अर्ब भन्दा माथि बीमा शुल्क उठाएका छन् ।

यूनाइटेड, ओरियन्टल, हिमालयन, एभरेष्ट, नेशनल, जनरल, सानिमा जनरल इन्स्योरेन्सले अर्ब भन्दा कम बीमाशुल्क संकलन गरेका छन् ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।