जीवन बीमा कम्पनीद्धारा ३४ अर्बको नयाँ व्यवसाय विस्तार,अघिल्लो वर्षको तुलनामा ५८% बढ्यो

जीवन बीमा कम्पनीले चालु आर्थिक वर्षको दश महिनामा ३४ अर्ब रुपैयाँको नयाँ जीवन बीमा व्यवसाय विस्तार गरेका छन् । कोरोना भाइरसको कारण जारी निषेधाज्ञाकाबीच जीवन बीमा कम्पनीहरुले आफ्नो नयाँ व्यवसाय विस्तार ५८ प्रतिशतले गरेका हुन् ।

सञ्चालनमा रहेका १९ जीवन बीमा कम्पनीले वैशाख मसान्तसम्ममा ३४ अर्ब २ करोड रुपैयाँ प्रथम बीमाशुल्क संकलन गरेका छन् । गत आर्थिक वर्षको वैशाख महिनासम्ममा कम्पनीहरुले २१ अर्ब ५३ करोड रुपैयाँ प्रथम बीमाशुल्क संकलन गरेका थिए ।

बीमा समितिले उपलब्ध गराएको तथ्यांकअनुसार रकमका आधारमा नेपाल लाइफ इन्स्योरेन्सले सबैभन्दा धेरै प्रथम बीमाशुल्क संकलन गर्न सफल भएको छ ।

नेपाल लाइफले यस अवधिमा ७ अर्ब ३६ करोड रुपैयाँ प्रथम बीमाशुल्क उठाएको हो । गत आवको यसै अवधिमा कम्पनीले ५ अर्ब ६४ करोड रुपेयाँको नयाँ व्यवसाय विस्तार गरेको थियो ।  यद्यपी कम्पनीको नयाँ व्यवसाय विस्तार भने १६ औं ठूलो मात्र हो ।

यस अवधिमा गुराँस लाइफले सबैभन्दा धेरै २७८ प्रतिशतले नयाँ ब्यवसाय विस्तार गरेको छ । गत आवको यसै अवधिमा ३८ करोड रुपैयाँ मात्र नयाँ ब्यवसाय विस्तार गरेको कम्पनीले हाल १ अर्ब ४४ करोड रुपैयाँ बराबरको नयाँ ब्यवसाय विस्तार गरेको छ ।

रकमका आधारमा नेपाल लाइफ लाइफपछि नेशनल लाइफ, इन्स्योरेन्स कर्पोरेशन (नेपाल) र युनियन लाइफले धेरै नयाँ व्यवसाय विस्तार गरेका छन् । नेशनलले तीन अर्ब ८ करोड र एलआईसीले तीन अर्ब ३ करोड रुपैयाँ र युनियन लाइफले दुई अर्ब ६० करोड रुपैयाँ प्रथम बीमाशुल्क संकलन गरेका छन् ।

प्राइम, गुराँस, एशियन, सूर्या, मेट लाइफ, सिटिजन, आइएमई, ज्योति, रिलायबल, रिलायन्स लाइफले अर्ब भन्दा धेरैको नयाँ व्यवसाय विस्तार गरेका छन् ।

महालक्ष्मी, प्रभु, राष्ट्रिय बीमा संस्थान, सानिमा, सन नेपाल लाइफ इन्स्योरेन्सले भने अर्ब भन्दा कमको नयाँ व्यवसाय विस्तार गरेका छन् ।

प्रथम बीमाशुल्क भनेको के हो ?

प्रथम बीमाशुल्क भनेको कम्पनीहरुले नयाँ ग्राहकहरुबाट संकलन गर्ने पहिलो प्रिमियम (एफपिआर) रकम हो । यसरी बीमा कम्पनीहरुले बिक्री गरेको सुरुवातको किस्ता वापत प्राप्त हुने रकम नै प्रथम बीमाशुल्क हो ।

बीमा कम्पनीहरुमा ग्राहकले बीमालेख खरीद गर्दा सुरुमा पहिलो किस्ता वापतको प्रिमियम तिर्छन् । त्यस्तै, थप प्रिमियम भने १ महिना ३ महिना, ६ महिना वा १ वर्षमा तिर्ने गरी खरीद गरेका हुन्छन् । बीमा कम्पनीहरुले दोस्रो वा सो भन्दा पछि संकलन गर्ने बीमाशुल्कलाई भने नवीकरण बीमाशुल्क भनिन्छ ।

यसरी पहिलो किस्ता (प्रथम बीमाशुल्क) वापत संकलन हुने प्रिमियम र नविकरण बीमा वापत प्राप्त हुने प्रिमियम शुल्कलाई जीवन बीमा कम्पनीहरुको वित्तीय विवरणमा देखाउने तरिका फरकरफरक हुन्छ ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।