आठ बैंकको कर्जा निक्षेप अनुपात ८०% धेरै, औषत ७७.३८ प्रतिशत

गत आर्थिक वर्ष २०७७/७८ मा आठ वाणिज्य बैंकको कर्जा निक्षेप अनुपात (सिडी अनुपात) ८० प्रतिशतभन्दा धेरै रहेको छ ।

समीक्षा अवधिमा वाणिज्य बैंकहरुको औषत कर्जा लगानी ७७.३८ प्रतिशत देखिएको छ ।

सञ्चालनमा रहेका २७ वाणिज्य बैंकमध्ये विसं २०७८ असार मसान्तसम्ममा मेगा बैंकको कर्जा निक्षेप अनुपात सबैभन्दा धेरै ८२.०२ प्रतिशत रहेको छ । बैंकले समीक्षा अवधिमा बैंकले १ अर्ब ४४ करोड २८ लाख रुपैयाँ निक्षेप संकलन गरी १ अर्ब ४१ करोड १२ लाख रुपैयाँ कर्जा लगानी गरेको छ । अघिल्लो आवको तुलनामा मेगा बैंकको निक्षेप संकलन १०.१५ प्रतिशत र कर्जा लगानी २३.८८ प्रतिशतले बढेको छ ।

यस अवधिमा नेपाल बंगलादेश बैंकको कर्जा निक्षेप अनुपात सबैभन्दा कम ६७.३७ प्रतिशत रहेको छ । बंगलादेश बैंकले गत आर्थिक वर्षमा ८९ अर्ब ३८ करोड रुपैयाँ निक्षेप संकलन गरी ७१ अर्ब १७ करोड रुपैयाँ कर्जा लगानी गरेको छ । समीक्षा अवधिमा निक्षेप संकलन २२.१२ प्रतिशतले बढाउँदा कर्जा लगानी १५.९७ प्रतिशतले बढेको छ ।

गत आर्थिक वर्षमा एनआईसी एशिया बैंक, कुमारी बैंक, सानिमा बैंक, सनराइज बैंक, सिभिल बैंक, सिद्धार्थ बैंक र माछापुच्छ्रे बैंकको कर्जा निक्षेप अनुपात ८० प्रतिशतभन्दा बढी छ ।

कर्जा निक्षेप अनुपात ८० प्रतिशतभन्दा बढी पुगेका बैंकहरुमा यस अवधिमा एनआईसी एशिया बैंकको निक्षेप संकलन ४२.४१ प्रतिशत र कर्जा लगानी ५२.४३ प्रतिशतले बढाएको छ । कुमारी बैंकले निक्षेप संकलन २६.५३ प्रतिशत र कर्जा लगानी २४.८७ प्रतिशत, सानिमा बैंकले निक्षेप संकलन १८.८८ प्रतिशत र कर्जा लगानी ३१.५१ प्रतिशतले बढेको छ ।

यसैगरी सनराइज बैंकको निक्षेप संकलन १६.३९ प्रतिशत र कर्जा लगानी २३.३१ प्रतिशत र सिभिल बैंकको निक्षेप संकलन ५०.२२ प्रतिशत र कर्जा लगानी ५४.२६ प्रतिशतले बढेको छ ।

एक वर्षको समीक्षा अवधिमा सिद्धार्थ बैंकले निक्षेप संकलन २६.९० प्रतिशत र कर्जा लगानी २९.९६ प्रतिशत र माछापुच्छ्रे बैंकको निक्षेप संकलन २५.६९ प्रतिशत र कर्जा लगानी २३ प्रतिशतले वृद्धि गरेको छ ।

ग्त आर्थिक वर्ष २०७७/७८ मा समग्र बैंकिङ्ग सेक्टरको निक्षेप संकलन २०.३८ प्रतिशतले बढेर ४२ खर्ब १ अर्ब पुगेको छ भने कर्जा लगानी २८.०७ प्रतिशतले बढेर ३७ खर्ब २० अर्ब रुपैयाँ पुगेको छ । कोभिड संक्रमणका कारण गत आर्थिक निक्षेप संकलन स्वभाविक ढंगमै भइरहेकाले पनि कर्जा लगानीका लागि यसले स्थिति केही सहज भएको बैंकरहरुको भनाइ छ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।