लघुवित्तहरुमै महङ्गो शेयरमूल्य रहेको महिलाको सबै सूचकमा उत्साहप्रद वृद्धि

लघुवित्तहरुमै सबैभन्दा धेरै शेयरमूल्य रहेको महिला लघुवित्त वित्तीय संस्था लिमिटेड (MLBSL) को गत आर्थिक वर्षको वित्तीय विवरणमा सबैजसो सूचकमा उत्साहप्रद वृद्धि देखिएको छ ।

महिलाले गत आर्थिक वर्ष २०७७/७८ को चौथो त्रैमाससम्ममा ९ करोड २९ लाख ८२ हजार रुपैयाँ खुद नाफा कमाएको छ। अघिल्लो आर्थिक वर्षमा ३ करोड ४७ लाख रुपैयाँ नाफा कमाएकोमा १६७.८६ प्रतिशतले नाफा बढाएको हो ।

चुक्ता पूँजी १० करोड रूपैयाँ रहेको लघुवित्तको नाफा बढेसँगै अघिल्लो आवको तुलनामा गत आवमा प्रतिशेयर आम्दानी ३५.१३ रुपैयाँ बढेर ९२.९८ रुपैयाँ कायम पुगेको छ । लघुवित्तको प्रतिशेयर नेटवर्थ ३२०.९० रुपैयाँ र मूल्य आम्दानी अनुपात ५२.३८ गुणा छ ।

सर्वसाधारणमा साधारण शेयर बिक्रीपश्चात चुक्ता पूँजी ६६.६७ प्रतिशतले बढाएको कम्पनीको समीक्षा अवधिमा जगेडा कोषको आकार ७२.७२ प्रतिशत,निक्षेप ४०.५० प्रतिशत, सापटी १२१.९४ प्रतिशत, कर्जा लगानी विस्तार ९.९६ प्रतिशतले बढेको छ । यस्तै खुद ब्याज आम्दानीमा ८७.४६ प्रतिशत र सञ्चालन नाफा १७७.८८ प्रतिशतको आकर्षक बढोत्तरी भएको छ ।

२०७८ असार मसान्तसम्ममा लघुवित्तले ९२ करोड ८० लाख रुपैयाँ निक्षेप संकलन, २ अर्ब २४ करोड ६८ लाख सापटी लिएर ३ अर्ब ३६ करोड ६७ लाख रुपैयाँ कर्जा लगानी गरेको छ । यसबाट लघुवित्तले २४ करोड ४ लाख ८३ हजार रुपैयाँ खुद व्याज आम्दानी र १० करोड ६० लाख ८५ हजार रुपैयाँ सञ्चालन नाफा कमाएको छ ।

संस्थाको जगेडा कोषमा २२ करोड ८ लाख रुपैयाँ सञ्चित छ । अघिल्लो आवमा १२ करोड ७९ लाख थियो । लघुवित्तको खराब कर्जा अनुपात ०.९३ बिन्दु बढेर १.७१ प्रतिशतमा पुगेको छ । 

लघुवित्तको दोस्रो बजारमा प्रतिकित्ता शेयरमूल्य ५ हजार ३०० रुपैयाँ रहेको छ । जुन लघुवित्तहरुमै सबैभन्दा उच्च मूल्य हो ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।