जलविद्युत कम्पनीको मूल्यमा पहिरो गएपछि नेप्सेमा भारी गिरावट, कारोबार रकमले पनि साथ छाड्दै

दुई दिनको सार्वजनिक विदापछि मंगलबार सातामा पहिलो दिन खुलेको शेयर बजारमा पहिलो दिनमा नै उच्च अंकको गिरावट आएको छ । अधिकांश जलविद्युत कम्पनीको शेयरमूल्यमा नकारात्मक सर्किट लागेर घटेपछि नेप्सेमा आधा शतकभन्दा बढीको गिरावट देखा परेको हो ।

मंगलबार १४ हाइड्रोपावर कम्पनीको शेयरमूल्य घटेर नकारात्मक सर्किट लागेको छ । यसदिन आँखुखोला हाइड्रोपावर, युनिभर्सल पावर, कालिका पावर, जोशी हाइड्रोपावर, रुरु जलविद्युत परियोजना, दिब्यश्वरी हाइड्रोपावर, घलेम्दी हाइड्रोपावर, सिनर्जी पावर, एचआईडिसीएल, नेपाल हाइड्रो डेभलोपर, युनियन हाइड्रोपावर, खानीखोला हाइड्रोपावर, नेशनल हाइड्रोपावर र शिवश्री हाइड्रोपावर कम्पनीको शेयरमूल्यमा नकारात्मक सर्किट लागेको हो ।

यसैगरी पञ्चकन्या माई हाइड्रोपावर, हिमालयन पावर पार्टनर, लिवर्टी इनर्जी, माउन्टेन हाइड्रो नेपाल, हिमालयन उर्जा विकास कम्पनी, र युनाइटेड मोदी हाइड्रोपावरको शेयरमूल्य पनि ९ प्रतिशत धेरैले घटेको छ ।

नेपाल स्टक एक्सचेञ्जका अनुसार मंगलबार सूचक ५६.०३ अंकले घटेर ३१२४.८७ बिन्दुमा झरेको छ । ठूला कम्पनीको सूचक मापक सेन्सेटिभ इन्डेक्स १२.८१ अंकले घटेर ५७७.६६ बिन्दुमा झरेको छ ।

नेप्सेमा उच्च अंकको गिरावट आएसँगै अघिल्लो कारोबार दिन बिहीबारको तुलनामा कारोबार रकम पनि ४ अर्ब ३७ करोडको भारी गिरावट आएको छ । नेप्सेमा आएको पहिरोले बजार सूचक अझ घट्नसक्ने आंकलन गर्दै लगानीकर्ताले घट्दो मूल्यमा पनि अझ घटाएर शेयर खरीद गर्न खोजेको देखिन्छ ।

मंगलबार विशेषतः जलविद्युत समुहका कम्पनीको शेयरमूल्यमा उच्च गिरावट आएको छ भने उच्च कारोबार हुने कम्पनीको सूचीमा पनि सोही समुहका कम्पनी अग्र स्थानमा रहेका छन् ।

कारोबारमा आएका फाइनान्स र निर्जीवन बीमा बाहेक सबै समुहका सूचकमा रातो पोतिएको छ । जलविद्युत सर्वाधिक ६.२१ प्रतिशतले घट्दा लगानी ४.४३ र विकास बै.क ३.९८, उत्पादन २.११, ब्यापार १.६२ र अन्य १.४४ प्रतिशतले घटेको छ । बाँकी समुहका सूचक १ प्रतिशतभन्दा कमले घटेका छन् ।

यसदिन जीवन विकास लघुवित्त र गोर्खाज फाइनान्सको शेयरमूल्यमा सकारात्मक सर्किट लागेको छ । सेन्ट्रल फाइनान्स ७.४७ र नेको इन्स्योरेन्स ५.०६ प्रतिशतले बढेको छ । जनरल इन्सयोरेन्स, प्रिमियर इन्सयोरेन्स, मनकामना स्मार्ट लघुवित्त, सिईडिबि हाइड्रोपावर डेभलपमेन्ट कम्पनी, रिडी र आईसीएफसी फाइनान्सको मूल्य पनि ३.३७ देखि ४.४९ प्रतिशतसम्म बढेको छ ।

मंगलबार अरुण भ्याली हाइड्रोपावरको सर्वाधिक ७५.४३ करोडको शेयर कारोबारमा आएको छ । अरुण काबेली ७१.९१ करोड र नेशनल हाइड्रोपावरको ५८.५३ करोडको शेयर कारोबार भएको छ । रिडी हाइड्रोपावर, नेपाल बैंक, आइसिएफसि फाइनान्स, सेन्ट्रल फाइनान्स, अपि पावर, कामना सेवा विका बैंक, र नेको इन्स्योरेन्स शीर्ष कारोबार गर्ने दश कम्पनीमा अटाएका छन् । दशौं ठूलो कारोबार भएको नेको इन्स्योरेन्सको ३०.९१ करोडको शेयर कारोबारमा आएको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।