सामलिङ्ग पावरको आईपीओ मंगलबार बिहान बाँडफाँड हुने

सामलिङ्ग पावर कम्पनी लिमिटेडले निष्कासन गरेको साधारण शेयर (आईपीओ) मंगलबार बिहान बाँडफाँड हुने भएको छ ।

कम्पनीको शेयर बिक्री प्रबन्धक नेपाल एसबिआई क्यापिटलका अनुसार आईपीओको प्रि-अलटमेन्ट गरी स्वीकृतिका लागि धितोपत्र बोर्डमा पठाइएको छ । बोर्डबाट स्वीकृति पश्चात मंगलबार शेयर बाँडफाँड गरिन लागिएको हो ।

कम्पनीको आईपीओमा अन्तिम दिन कार्तिक ८ गतेसम्ममा २२ लाख ६५ हजार ६९८ वटा आवेदन परेको थियो । उक्त संख्याको आवेदनबाट २ अर्ब ६९ करोड ३३ लाख ५० हजार रुपैयाँ बराबरको २ करोड ६९ लाख ३३ हजार ५०० कित्ताका लागि आवेदन परेको हो । जुन सर्वसाधारणका लागि माग गरिएको भन्दा ३९.६७ गुणा धेरै हो ।

धितोपत्र बाँडफाँड निर्देशिका २०७४ अनुसार ६७ हजार ८९० जना आवेदकले गोलाप्रथाबाट १० कित्ताका दरले शेयर पाउनेछन् । यसअनुसार २१ लाख ९७ हजारको हात खाली हुनेछ ।

कम्पनीले कार्तिक ४ गतेदेखि कुल ७ लाख ३० हजार कित्ता साधारण शेयर बिक्री खुला गरेको हो । कुल निष्काशन तथा बिक्री खुल्ला गरिएको शेयरमध्ये ५ प्रतिशत अर्थात ३६ हजार ५०० कित्ता सामूहिक लगानी कोष र २ प्रतिशत अर्थात १४ हजार ६०० कित्ता शेयर कर्मचारीहरुका लागि छुट्याइएको थियो । यसरी बाँकी रहेको ६ लाख ७८ हजार ९०० कित्ता शेयर खरीदका लागि सर्वसाधारणबाट आवेदन माग गरिएको थियो ।

कम्पनीले यस अघि नै आयोजना अति प्रभावित क्षेत्र ईलाम नगरपालिका वडा नं ८ र १० तथा माईजोगमाई गाँउपालिका वडा नं ४ र ५ का बासीन्दाहरु तथा आयोजना प्रभावित ईलाम जिल्लाका स्थानीयबासीको लागि शेयर निष्काशन गरि बाँडफाँड गरिसकेको छ ।

आईपीओ निष्काशनका लागि गराएको रेटिङ्गमा इक्रा नेपालले कम्पनीलाई ’इक्रा एनपी आईआर डबल बी माइनस रेटिङ्ग’ प्रदान गरेको छ । यसले कम्पनीले वित्तीय दायित्व पूरा गर्न सक्ने सम्बन्धमा मध्यम जोखिम रहेको जनाउँदछ ।

कम्पनीले इलाम जिल्ला स्थित माईबेनी जलविद्युत आयोजनाबाट ९.५१ मेगावाट जलविद्युत आयोजनाको सम्पूर्ण निर्माण कार्य सम्पन्न गरी मिति २०७८ आश्विन १ गतेदेखि व्यापारिक उत्पादन सुरु गरिसकेको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।