टाटा मोटर्सले २०२२ देखि सबै व्यवसायिक सवारीको मूल्य वृद्धि गर्ने

भारतको सबैभन्दा ठूलो व्यावसायिक सवारी साधन निर्माता टाटा मोटर्सले अंग्रेजी नयाँ वर्ष सन् २०२२ देखि सबै खालका व्यवसायिक सवारी साधनहरूको मूल्य बढाउने भएको छ ।

टाटा मोटर्सले जनवरी १, २०२२ देखि सबै व्यवसायिक मोडेलका गाडीहरुमा २.५% ले मूल्य वृद्धि गर्ने जनाएको हो । गाडीहरुमा प्रयोग हुने स्टिल, आल्मुनियम र अन्य बहुमूल्य धातु जस्ता वस्तुमा भएको मूल्य वृद्धि तथा अन्य कच्चा पदार्थको मूल्यमा भएको वृद्धिले लागत बढ्दा भाउ बढाउनुपरेको कम्पनीको भनाई छ ।

सवारी साधनको भारवाहन क्षमताका आधारमा मध्यम तथा मालवाहक सवारी साधन (एमएन्डएचसीभी), मध्यम तथा हलुका व्यवसायिक सवारीसाधन (आइएन्डएलसीभी), साना तथा घरेलु व्यवसायिक साधन (एलसीभी), बस र आधारभूत व्यक्तिगत मोडेलका गाडीहरुमा २.५% ले मूल्य वृद्धि हुने कम्पनीद्धारा जारी विज्ञप्तीमा उल्लेख छ ।

यसअघि कार निर्मातामा अब्बल रहेको मारुती सुजुकी इन्डिया तथा लक्जरी कार निर्माताहरू मर्सिडीज बेन्ज र अउडीले पनि गत साता नै बढ्दो निमार्ण लागत र फिचर वृद्धि लागतहरू समायेजन गर्दै जनवरीदेखि मूल्य बढाउने जनाइसकेका छन् ।

कार निर्माता मारुती सुजुकीले पनि गत महिना बढ्दो निमार्ण लागतको दबाबले आफ्ना गाडीहरूको मूल्य २ प्रतिशतले बढाएको छ । कम्पनीले यसअघि गत जनवरीमा १.४, अप्रिलमा १.६ र सेप्टेम्बरमा १.९ गरी कुल ४.९ प्रतिशतले मूल्य बढाइसकेको छ । कम्पनीले दिल्लीको शोरूममा नै ह्याचब्याक अल्टो देखि स्पोर्ट युटिलिटी भेइकल (एसयूभि) ३.१५ लाख देखि १२.५६ लाख भारुमा बिक्री गर्दै आइरहेको छ ।

अर्कोतर्फ, अउडीले आगामी जनवरीदेखि लागू हुनेगरी ३ प्रतिशत मूल्य बढाउने भएको छ । कम्पनीले निमार्ण र सञ्चालन लागत बढेपछि आफ्ना सम्पूर्ण मोडेलमा मूल्य वृद्धि गरेको हो ।

मर्सिडीज बेन्जले पनि केही मोडेलहरूको जनवरी १, २०२२ देखि लागू हुन गरी मूल्य परिमार्जन गरेको छ । कम्पनीले आफ्ना केही मोडेलहरूको एक्स शोरूम मूल्यमा माथिल्लो मूल्यमा २ प्रतिशत बढाएको छ । कम्पनीले निमार्ण लागत र थप फिचर संवद्र्धनको लागत घटाउन मूल्यलाई परिमार्जन गरेको उल्लेख गरेको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।