नेप्सेले १६६.६७ प्रतिशत लाभांश बाँड्ने, पुस २९ गते साधारण सभा आह्वान

नेपालको एकमात्र धितोपत्र दोस्रो बजार सञ्चालक नेपाल स्टक एक्सचेञ्ज (नेप्से) ले गत आर्थिक वर्षको नाफाबाट १६६.६७ प्रतिशत लाभांश वितरण गर्ने भएको छ ।

नेप्सेल चुक्ता पूँजी ६० करोड रुपैयाँको ६६.६७ प्रतिशत बोनस सेयर र कर समेत १०० प्रतिशत नगद लाभांश वितरण गर्न पुस २९ गते ४० औं वार्षिक साधारण सभा आह्वान गरेको छ ।

उक्त लाभांश प्रस्ताव पारितका लागि नेप्सेले यूएनआई शान्तिमार्ग, काठमाडौंमा रहेको कार्यालयमा पुस २९ गते बिहान ११ बजे सभा ४० औं वार्षिक साधारण सभा बोलाएको छ ।

सभाले सहायक कम्पनी सिडिएस एण्ड क्लियरिङ लिमिटेड सहितको आर्थिक वर्ष २०७७।७८ सम्मको वार्षिक प्रतिवेदन सहितका वित्तीय विवरणहरु पारित गर्नुका साथै चालू आवको लागि लेखापरिक्षक नियुक्ती र निजको पारिश्रमिक निर्धारण गर्नेछ ।

साधारण सभाका लागि नेप्सेले पुस १८ गते आइतबार एकदिन सेयर दाखिल खारेजी (बुकक्लोज) गर्ने भएको छ ।

नेप्सेमा सबैभन्दा धेरै सेयर लगानी नेपाल सरकारको ५८.६६ प्रतिशत रहेको छ । नेपाल सरकारपछि ठूलो लगानी भएको राष्ट्र बैंकको १४.६० प्रतिशत, कर्मचारी सञ्चय कोषको १० प्रतिशत, राष्ट्रिय वाणिज्य बैंकको ६.१२ प्रतिशत, प्रभुु बैंकको ५ प्रतिशत, लक्ष्मी बैंकको ५ प्रतिशत र सेयर ब्रोकहरुको ०.६२ प्रतिशतभन्दा कम लगानी छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।