ट्रेड टावरले साढे ११ करोडको आईपीओ ल्याउने, बिक्री प्रबन्धकमा लक्ष्मी क्यापिटल

ट्रेड टावर ग्रुपको प्यारेन्ट कम्पनी ट्रेड टावर लिमिटेडले सर्वसाधारणका लागि साढे ११ करोड बढीको प्रारम्भिक सार्वजनिक निष्काशन (आईपीओ) बिक्री गर्ने भएको छ ।

कम्पनीले जारी पूँजी ४६ करोड ५० लाख रुपैयाँको २४.९ प्रतिशतले हुन आउने ११ करोड ५८ लाख ९८ हजार रुपैयाँ बराबरको आईपीओ जारी गर्ने भएको हो ।

प्रतिसेयर १०० अंकित दरका कुल ११ लाख ५८ हजार ९८० कित्ता आईपीओ जारी गर्न कम्पनीले लक्ष्मी क्यापिटल मार्केट लिमिटेडलाई धितोपत्र निष्काशन तथा बिक्री प्रबन्धक नियुक्त गरेको छ ।

उक्त समझदारीपत्रमा ट्रेड टावरका कार्यकारी अध्यक्ष शिवहरि दंगाल र लक्ष्मी क्यापिटलका प्रमुख कार्यकारी अधिकृत राजीव सापकोटाले हस्ताक्षर गरेका छन् ।

ट्रेड टावर २०६७ साल देखि लिमिटेड कम्पनीको रुपमा सञ्चालनमा रहेको छ । कम्पनीका उद्देश्यहरुमध्ये होटेल–हस्पिटालिटी, लिजिङ एन्ड फाइनान्सिङ लगायत पूर्वाधारका परियोजना विकास गर्ने तथा लगानी गर्ने रहेका छन् ।

कम्पनीले नेपाल खाद्य संस्थानको थापाथलीस्थित जग्गा लिजमा लिई नेपालकै सबैभन्दा ठूलो सिंगल विल्डिङ कम्प्लेक्स विगत १३ वर्षदेखि सञ्चालन गरिरहेको छ ।

त्यस्तै ललितपुर–भैंसेपाटी रेडियो टावरसँगै जोडिएको १९० वटा अपार्टमेन्ट निर्माण गरी कम्पनीले यो आयोजना सफलतापूर्वक सम्पन्न गरेको छ ।

यसैगरी कम्पनीले काठमाण्डौ वडा नं. ९ गौशालास्थित पशुपतिनाथको दक्षिणतर्फ रिङरोडमा जाडिएको करिब ४ रोपनी जग्गा ३६ वर्षका लागि लिजमा लिई हाल निर्माण भइराखेको व्यापारिक भवनको निर्माण कार्य आगामी २. ५ वर्षमा सक्ने लक्ष्य राखेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।