चिनीको मूल्य नियमन गर्न राष्ट्रिय उपभोत्ता मञ्चको आग्रह

राष्ट्रिय उपभोक्ता मञ्चले चिनीको मूल्य नियमन गर्न सरकारसँग आग्रह गरेको छ। उपभोत्ता मञ्चले बढ्दै गएको चिनीको मूल्य नियमन गरी पाउँ भन्दै प्रधानमन्त्री तथा मन्त्री परिषद्को कार्यालयमा निवेदन बुझाएको छ ।

नेपालमा वार्षिक रुपमा कुल २८० लाख मेट्रिक टन चिनीको आवश्यकता पर्दछ । नेपालका १३ वटा चिनी उद्योगहरुको उत्पादन क्षमता १८० लाख रहेको छ । यसरी माग र स्वदेशी उत्पादनमा तालमेल नमिल्दा वर्षेनी नेपालले करिव १०० लाख मेट्रिक टन चिनी भारत र पाकिस्तानबाट आयात गर्ने गरेको मञ्चको भनाई छ ।

भारतीय बजारमा ३५ देखि ३८ रुपैयाँमा पाइने चिनीको मूल्य नेपाली बजारमा १०० देखि १०५ सम्म रहेको छ । नेपालमा विगत चार वर्ष देखि अन्तराष्ट्रिय बजार मूल्यको तुलनामा चिनीको मूल्य अत्यधिक मात्रामा बढेको मञ्चले बताएको छ ।

नेपालमा चिनी उत्पादकहरुको मनपरी र दबावका कारण भारत र पाकिस्तानबाट ल्याइएको चिनीमा ४५ प्रतिशत भन्दा बढी भन्सार महसुल लिने गरिएको छ । यसैकारण नेपालमा चिनीको मूल्य आकाशिन पुगेको छ । तर मूल्य वृद्धि भए अनुसारकोे उखुको भुक्तानी भने किसानहरुले पाइरहेका छैनन् ।

उत्पादकहरुको मनमर्जी र उद्योगीहरुले आपूर्ति व्यवस्थामा असहज हुने गरी चिनी सप्लाई नगर्ने जस्तो गैर जिम्मेवार पूर्ण काम गर्नाले उपभोत्ता र किसान दुवै मारमा परेका छन् ।

राष्ट्रिय उपभोत्ता मञ्चले चिनी उद्योगीहरुको बद्नियत र त्यसले सर्वसाधारण जनता र किसानवर्गलाई परेको असर प्रति नेपाल सरकारलाई ध्यानाकर्षण गराएको छ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।