सगरमाथा इन्स्योरेन्सको लाभांश पारित गर्न वैशाख २८ गते साधारण सभा

सगरमाथा इन्स्योरेन्स कम्पनी लिमिटेडले आर्थिक वर्ष २०७७।७८ को मुनाफाबाट सेयरधनीहरुलाई वितरण गर्न प्रस्तावित लाभांश पारित गर्न वैशाख २८ गते साधारण सभा गर्ने भएको छ ।

कम्पनीको वैशाख ५ गते सोमबार बसको सञ्चालक समितिको बैठकले वैशाख २८ गते कम्पनीको २५ औं वार्षिक साधारण सभा आयोजना गर्ने निर्णय गरेको हो ।

कम्पनीले यसअघि नै चुक्ता पूँजीको २० प्रतिशत बोनस सेयर र बोनसको कर प्रयोजनका लागि १.०५२६३ प्रतिशत नगद लाभांश वितरण गर्ने प्रस्ताव गरेको थियो ।

सो लाभांश वितरणका लागि बीमा समितिले स्वीकृति दिएपछि साधारण सभा बोलाएको हो । कम्पनीले मंगलबार जारी गरेको सूचनामा साधारण सभा प्रयोजनका लागि बुक् क्लोजको मिति भने उल्लेख गरिएको छैन ।

कम्पनीको आगामी वार्षिक साधारण सभाले अनुमोदन गरेपछि मात्र लगानीकर्ताले लाभांश पाउनेछन् ।

कम्पनीको २०७६।७७ मुनाफाबाट चुक्ता पूँजीको ११ प्रतिशत बोनस सेयर र ०.५७८९ प्रतिशत नगद लाभांश वितरण गरेको थियो । समीक्षा अवधिमा कम्पनीको लाभांश १० प्रतिशतले बढेको हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।