चौवालिस अर्ब डलरमा इलोन मस्कले किने ट्वीटरको सम्पूर्ण स्वामित्व

टेस्लाका प्रमुख कार्यकारी अधिकृत तथा विश्वका सर्वाधिक धनी व्यक्ति इलोन मस्कले दुई चरणमा गरेर माइक्रो ब्लगिङ साइट ट्वीटरको सम्पूर्ण सेयर स्वामित्व खरिद गरेका छन् ।

समाचार एजेन्सी ‘रोएटर्स’ ले ४४ अर्ब डलरमा ट्वीटरको सम्पूर्ण स्वामित्व खरिद गर्ने सम्झौतामा मस्क र ट्वीटरबीच सोमबार सहमति भएको जनाएको छ ।

सामाजिक ट्विटरको सञ्चालक समिति (बोर्ड) ४४ अर्ब डलरमा उक्त कम्पनी अधिग्रहण गर्ने अर्बपति इलोन मस्कको प्रस्तावमा सहमत भएको हो । मस्कले दुई साताभन्दा कम समयअघि सबैलाई चकित पार्दै ट्विटरको बोली लगाएका थिए ।

मस्कले ट्वीटर खरिद गर्नका लागि ४६.५ अर्ब डलर लगानी सुरक्षित जुटाएका थिए । कम्पनीले सुरुमा मस्कले लगाएको बोलीलाई अस्वीकार गरेको थियो । लगानी जुटाएको खबर सार्वजनिक भएपछि ट्वीटरका सेयरधनीहरुले पनि बिक्रीका लागि बोर्डलाई दबाब दिएका थिए । यसअघि भने मस्कको प्रस्तावपछि ट्वीटरले रक्षात्मक बन्दै ‘पोइजन पील’ लागू गरेको थियो ।

ट्वीट श्रृङ्खलामा उनले कम्पनीको हेडक्वाटरलाई घरबारविहीनहरुको लागि आश्रय बनाउनेदेखि प्लेटफर्मको ‘प्रिमियम सर्भिस’ बाट विज्ञापन हटाउनेबारे सवाल गरेका थिए । यस्तै उनले त्यसबेला ट्विटरमा व्यापक सम्भावना रहेको र ती सम्भावनाका ढोकालाई आफूले खोल्ने बताएका थिए । उनले नक्कली खाताहरूलाई हटाउने तथा उसका सामग्रीमाथिका प्रतिबन्धहरूलाई खुकुलो पार्नेसम्मका धेरै परिवर्तनहरूका लागि पनि आह्वान गरेका थिए ।

टेस्लाका प्रमुख कार्यकारी अधिकृत मस्कले गत चैत २१ गते पहिलोपटक ट्वीटरको ९.२० प्रतिशत सेयर ५४.२० डलर प्रतिसेयरका दरले खरिद गरेका थिए । उनले ७ करोड ३४ लाख ८६ हजार ९३८ कित्ता सेयर किनेका थिए । त्यसपछि मस्कले ट्वीटरको बाँकी सबै सेयर ४४ अर्ब डलरमा खरिद गरेर ट्वीटरको मालिक बनेका हुन् ।

यससँगै विश्वभरका राजनीतिज्ञ र लाखौं प्रयोगकर्ताहरुले भरिएको सामाजिक सञ्जाल अर्बपति इलोन मस्कमा पुगेको छ । समाचार र राजनीतिक एजेन्डालाई आकार दिन ट्वीटरले संसारभर निर्णायक भूमिका खेलेको पाइन्छ ।

फोब्र्स पत्रिकाका अनुसार विश्वका सबैभन्दा धनी व्यक्ति मस्क २७३.६० अर्ब डलरको सम्पत्तिका मालिक हुन् । २७३ अर्ब डलरको सम्पत्तिका मालिकको हातमा ट्वीटरको स्वामित्व पुग्नु एक संवेदनशील मुद्दा भएको जानकारहरु बताउँछन् । उनी विद्युतीय कार निर्माता कम्पनी ‘टेस्ला’ र रकेट कम्पनी ‘स्पेसएक्स’का सीईओ पनि हुन् । लोकप्रिय व्यक्तिहरुमध्येका एक इलोन मस्कका ८१.६ मिलियन फलोअर छन् ।

ट्वीटरको वार्षिक आम्दानी ५ बिलियन डलर बराबर रहेको छ । जसमा ९० प्रतिशत योगदान विज्ञापनको छ । ट्वीटरको पछिल्लो चौमासिक प्रतिवेदन अनुसार यस वर्ष दैनिक सक्रिय प्रयोगकर्ताहरू २५ मिलियनले बढेर २१७ मिलियन पुगेको छ । कम्पनीले अर्को वर्षको अन्त्य सम्ममा ट्वीटरले ३१५ मिलियन दैनिक सक्रिय प्रयोगकर्ता पुग्ने लक्ष्य कायम राखेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।