रेमिट्यान्सको रकम पूँजी निर्माणमा प्रयोग गर्नुपर्ने आवश्यकता छः अर्थसचिव मरासिनी

अर्थसचिव मधुकुमार मरासिनीले रेमिट्यान्सको रकम पुँजी निर्माणमा प्रयोग गर्नुपर्ने आवश्यकता रहेको बताएका छन् ।

आइएमई ग्रुप अन्तर्गतको रेमिट्यान्स कम्पनी आइएमई लिमिटेडको २२ औं वार्षिकोत्सवलाई सम्बोधन गर्दै अर्थसचिव मरासिनीले रेमिट्यान्सको रकम गाँस, बास र कपासका लागि बढी खपत भइरहेकोमा त्यसमा परिवर्तन ल्याउनुपर्ने बताएका हुन् ।

‘रेमिट्यान्सको पैसा व्यक्तिगत खपतमा बढी प्रयोग हुने गरेको देखिन्छ । पहिले त गाँस, बास र कपासको व्यवस्थापन नै गर्ने हो’ उनले भने, ‘आउँदा दिनमा भने रेमिट्यान्सको पैसा राष्ट्र निर्माणमा प्रयोग गर्नुपर्ने आवश्यकता छ ।’

कार्यक्रममा उनले श्रम बेचेर पैसा कमाइरहेको परिस्थितिलाई परिवर्तन गर्ने गरी आगामी आर्थिक वर्षको बजेट ल्याइएको उल्लेख गरे । उनले बजेट मार्फत स्वदेशी उत्पादन बेचेर विदेशी मुद्रा आर्जन गर्ने लक्ष्य राखेको बताए । आइएमई लिमिटेडले विदेशी मुद्रा भित्र्याउने संस्कृतिमा रुपान्तरण गरेको उनको भनाई थियो ।

कार्यक्रममा मुख्य सचिव शङ्करदास बैरागीले औपचारिक माध्यमबाट विप्रेषण भित्र्याउन आइएमई जस्ता संस्थाको महत्वपूर्ण भूमिका रहेको जनाउँदै यसले मुलुकको अर्थतन्त्रमा ठूलो योगदान पुर्‍याएको बताए ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।