त्रिशुली जलविद्युतमा १० रुपैयाँमा आईपीओ किनेकाले आजसम्म मात्रै रकम थप्नसक्ने

जनताको जलविद्युत कार्यक्रममा आबद्ध त्रिशुली जलविद्युत कम्पनी लिमिटेडको दश रुपैयाँमा सेयर खरिद गरेका सेयरधनीहरुले आज (फागुन १७) गतेसम्म मात्रै थप रकम भुक्तानी गनर्् पाउने भएका छन् ।

यसअघि कम्पनीले २०७९ असोज ४ गतेदेखि कार्तिक ७ गतेसम्म समय दिएर लगानी थप्न आह्वान गरेको थियो । सो समयमा चुक्ता गर्न बाँकी सेयरधनीमध्ये ४६ हजार १७९ जना सर्वसाधारणले रकम थप नगरेपछि ती सेयरधनीलाई कम्पनीले पुनः तीन महिनाको समय दिएको थियो ।
हालसम्म बाँकी ९० रुपैयाँ रकम थप नगरेका लगानीकर्ताले बुधबार कार्यालय समयभित्र ८८ रुपैयाँ ७४ पैसाका दरले आफुले खरिद गरेको सेयर संख्याको हिसाबले रकम भुक्तानी गर्न सक्नेछन् ।

बिक्री प्रबन्धक ग्लोबल आइएमई क्यापिटलका अनुसार उक्त रकम सेयरधनीहरुले बिक्री प्रबन्धकको कार्यालय नक्साल काठमाण्डौंका साथै नेपाल धितोपत्र बोर्डबाट अनुमति प्राप्त आस्वा सेवामा सहभागि बैंक तथा वित्तीय संस्थाहरु र तिनका शाखा कार्यालयहरु तथा सिडिएस एण्ड क्लियरिङ लिमिटेडबाट उपलब्ध गराइएको ‘मेरो सेयर’ सफ्टवेयर र मेरो सेयरको मोबाइल एपबाट समेत सेयरधनीहरुले रकम बुझाउन सक्नेछन् ।

लगानी थप नगरे सेयर जफत

बिक्री प्रबन्धकका अनुसार आजसम्म सेयर खरिद बापतको रकम नबुझाउने सेयरधनीले आगामी दिनमा रकम थप्न पाउनेछैनन् । यसरी थप नभएको रकम बराबरको सेयर जफत हुनेछ ।

सेयरधनीले यसअघि दश रुपैयाँका दरले अग्रिम भुक्तानी वापत बुझाएको रकम बराबरको कित्ता मात्र सेयर पाउनेछन् भने थप्न बराबरको बाँकी रकमको सेयर पाउनेछैनन् । यसरी थप्न बाँकी रहेको सेयर जफत हुने कम्पनीले जनाएको छ ।

कम्पनीका एक अधिकारीका अनुसार थपिएको तीन महिना (२०७९ मंसिर १८ देखि फागुन १७) को अवधिमा समेत रकम थप नभए सम्बन्धीत सेयरधनीले अग्रिम रुपमा भुक्तानी गरेको रकम र सो रकममा कम्पनीले प्रदान गरेको ब्याज रकमले खामेजति संख्याको सेयर संख्या कायम गरी सेयरधनीहरुको नाममा रहेको बाँकी सेयर भने जफत हुन्छ ।

यसरी जफत गरिएको सेयर जनताको जलविद्युत कार्यक्रम (सञ्चालन तथा व्यवस्थापन) कार्यविधिको दफा ८ ले गरेको व्यवस्था बमोजिम संस्थापक समुहले लिनेछ । त्रिशुली जलविद्युत कम्पनीमा नेपाल दूरसञ्चार कम्पनी लिमिटेड र नेपाल विद्युत प्राधिकरण संस्थापक लगानीकर्ता रहेका छन् । कम्पनीमा दुबैको ३०–३० प्रतिशत लगानी रहेको छ ।

सेयरधनीलाई रकम थप गर्न कम्पनीले दुई पटक समय दिइएको छ । दश रुपैयाँमा सेयर खरिद गरेका सेयरधनीलाई पहिलो चरणमा २०७९ असोज ४ गतेदेखि कार्तिक १७ गतेसम्म ८७ रुपैयाँका दरले रकम थप्न आह्वान गरिएको थियो । सो समयमा १ लाख ८ हजार ३८० जना लगानीकर्ताले रकम थप गरेका थिए ।

त्रिशुली जलविद्युतमा कुल १ लाख ५४ हजार ५५९ जना सेयरधनी रहेका छन् । ४६ हजार १७९ जनाले रकम थप नगरेपछि कम्पनीले मंसिर १८ गतेदेखि फागुन १७ गतेसम्म दोस्रो पटक समय दिएको हो । यस अवधिमा रकम थप गर्नेले प्रतिसेयर ८८ रुपैयाँ ७४ पैसा भुक्तानी गर्नुपर्ने हुन्छ ।
पहिलो पटक रकम थप्दा अग्रिम भुक्तानी गरेको प्रतिकित्ता १० रुपैयाँ भुक्तानी गरेको रकमबाट प्राप्त हुने वार्षिक ८ प्रतिशतले हुन आउने ३ रुपैयाँ ब्याज घटाएर ८७ रुपैयाँ बुझाए हुन्थ्यो । सो समयमा नबुझाउने रकम बुझाउन दिइएको ३ महिनाको वार्षिक ८ प्रतिशतका दरले लाग्ने ब्याजदर रकम (१ रुपैयाँ ७४ पैसा) थप गरी प्रतिसेयर ८८ रुपैयाँ ७४ पैसा भुक्तानी गर्नुपर्ने भएको हो ।

२०७५ चैतमा निष्कासन भएको थियो आईपीओ

नेपाल सरकारको ‘जनताको जलविद्युत कार्यक्रम’ अन्तर्गत सञ्चालित त्रिशुली जलविद्युत कम्पनी लिमिटेडले २०७५ चैत ७ गतेदेखि ११ गतेसम्म साधारण सेयर निष्काशन गरेको थियो ।

कम्पनीले जारी पूँजी २ अर्ब ४७ करोड रुपैयाँको १५ प्रतिशतले हुन आउने ३७ करोड ५ लाख रुपैयाँ बराबरको प्रतिकित्ता १०० अंकित दरका ३७ लाख ५ हजार कित्ता सेयर निष्कासन गरेको थियो । सो समयमा निष्काशित सेयरको अंकित मूल्यको १० प्रतिशतका दरले सर्वसाधारणबाट प्रतिकित्ता १० रुपैयाँका दरले अग्रिम माग गरि उक्त सेयरको बाँडफाँड २०७५ साल चैत १४ गते गरिएको थियो ।

नुवाकोटको साविक मनकामना गाविस र रसुवाको लहरेपौवा गाविसको सीमानामा आयोजना रहेको छ । आयोजनाको कूल क्षमता ३७ मेगावाट रहेको छ भने कूल लागत निर्माण अवधिको व्याज समेत गरी कूल आठ अर्ब २२ करोड ७४ लाख रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।