धितोपत्र बोर्डले थप दुई हाइड्रोपावरलाई दियो ३७ लाख कित्ता आईपीओ बिक्री अनुमति

पुँजी बजारको नियामक निकाय नेपाल धितोपत्र बोर्डले दुई हाइड्रोपावर कम्पनीलाई ३७ करोड मूल्यको ३७ लाख कित्ता प्राथमिक सार्वजनिक निष्कासन (आईपीओ) को बिक्री अनुमति दिएको छ ।

बोर्डले चिर्खुवा हाइड्रोपावर लिमिटेड र माथिल्लो मैलुङ्गखोला जलविद्युत लिमिटेड दुबै कम्पनीलाई असार २० गते बुधबार आईपीओ बेच्न अनुमति दिएको हो । दुबैले आयोजना प्रभावित स्थानीय बासिन्दा र सर्वसाधारणका लागि सेयर बिक्रीको अनुमति पाएका हुन् । चिर्खुवा हाइड्रोपावरले आईपीओ निष्कासन गर्न २०७९ कार्तिक १७ गते नेपाल धितोपत्र बोर्डमा निवेदन निवेदन दिएको छ । 

बोर्डका अनुसार चिर्खुवा हाइड्रोपावर लिमिटेडले प्रतिकित्ता १०० रुपैयाँ अंकित दरका १२ करोड मूल्यको १२ लाख कित्ता सेयर बिक्रीको अनुमति पाएको हो । कम्पनीले जारी पुँजीको ३० प्रतिशत बराबरको सार्वजनिक निष्कासन गर्न लागेको हो । जारी पुँजीको ७० प्रतिशत बराबरको २८ करोड भने संस्थापकहरुबाट चुक्ता भैसकेको छ । कम्पनीको धितोपत्र निष्कासन तथा बिक्री प्रबन्धकमा आरबिबि मर्चेन्ट बैंकिङ्ग लिमिटेड रहेको छ ।

कम्पनीले भोजपुरमा ४.७ मेगावाट अपर चिर्खुवा जलविद्युत आयोजना र भोजपुर मै ४.०६ मेगावाटको लोअर चिर्खुवा जलविद्युत आयोजना निर्माण गरिरहेको छ । 

यस्तै माथिल्लो मैलुङ्गखोला जलविद्युत लिमिटेडले प्रतिकित्ता १०० रुपैयाँ अंकित दरका २५ करोड मूल्यको २५ लाख कित्ता सेयर बिक्रीको अनुमति पाएको हो । कम्पनीले जारी पुँजीको २५ प्रतिशत बराबरको सार्वजनिक निष्कासन गर्न लागेको हो । जारी पुँजीको ७५ प्रतिशत बराबरको ७५ करोड भने संस्थापकहरुबाट चुक्ता भैसकेको छ । कम्पनीको धितोपत्र निष्कासन तथा बिक्री प्रबन्धकमा सानिमा क्यापिटल लिमिटेड रहेको छ ।

सानिमा समूह अन्तर्गतको माथिल्लो मैलुङखोला जलविद्युत लिमिटेडले आईपीओ निष्कासन माग गर्दे २०७९ फागुन ३ गते नेपाल धितोपत्र बोर्डमा आवेदन दिएको थियो । कम्पनीले रसुवामा १४.३० मेगावाटको माथिल्लो मैलुङखोला जलविद्युत आयोजना निर्माण गरिरहेको छ ।

यसअघि अघिल्लो हप्तामै यी दुई बाहेक बोर्डले पाँच कम्पनीलाई सेयर बिक्रीको अनुमति दिएको थियो । यससँगै एक सातामै ७ कम्पनीले आईपीओ बिक्रीको अनुमति पाएका हुन् । एकैपटक ठूलो संख्यामा सेयर बिक्रीको अनुमति पाएसँगै प्राथमिक बजारमा आईपीओको बाढी लाग्ने भएको छ ।

गत साता मात्रै बोर्डबाट हाथवे इन्भेष्टमेन्ट, मिड सोलु हाइड्रोपावर, माण्डू हाइड्रोपावर, सन् नेपाल लाइफ इन्स्योरेन्स, सिटिजन लाइफ इन्स्योरेन्स, चिर्खुवा हाइड्रोपावर र माथिल्लो मैलुङ्गखोला जलविद्युत लिमिटेडले आईपीओ बेच्न अनुमति पाएका हुन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।