हिमालयन रि इन्स्योरेन्सको आईपीओ अधिकतम १८० कित्तासम्म बाँडफाँड

हिमालयन रि इन्स्योरेन्स लिमिटेडको प्राथमिक सार्वजनिक निष्कासन (आईपीओ) मा वैदेशिक रोजगारीमा रहेका नेपालीहरुले अधिकतम १८० कित्तासम्म सेयर प्राप्त गरेका छन् ।

बिक्री प्रबन्धक एनएमबि क्यापिटलको कार्यालयमा आज भएको सेयर बाँडफाँडमा १७० कित्तासम्म सेयर माग गर्नेले माग बमोजिम र सोभन्दा बढी (१८० कित्ता देखि १९ हजार ५०० कित्तासम्म) सेयर माग गर्ने ६ हजार ९३४ जना आवेदकमध्येबाट गोलाप्रथाबाट २ हजार ६५१ जनाले थप १० कित्ता गरी १८० कित्ता सेयर हात पारेका हुन् । यसअनुसार २ हजार ६५१ जनाले अधिकतम १८० कित्ताका दरले सेयर प्राप्त गरे भने १७० कित्तासम्म माग गर्नेले माग अनुसारको सेयर हात पारेका हुन् ।

हिमालयन रिले श्रम स्वीकृति लिई वैदेशिक रोजगारमा रहेका नेपालीलाई ३० लाख कित्ता सेयर १०६ रुपैयाँ प्रिमियम थपेर प्रति कित्ता २०६ रुपैयाँ दरमा मङ्सिर ४ देखि २० गतेसम्म आईपीओ जारी गरेको थियो ।  बिक्री प्रबन्धक एनएमबि क्यापिटलका अनुसार आईपीओमा कुल ३२ हजार ६४ वटा आवेदनबाट ४३ लाख ३९ हजार १७० कित्ताको माग परेको थियो । सोमध्ये ८ जनाबाट माग भएको ५२० कित्ताको आवेदन रद्द भएको छ । योग्य ठहरिएका ३२ हजार ५६ जना आवेदनबाट प्राप्त ४३ लाख ३८ हजार ६५० कित्ताको मागलाई बाँडफाँड प्रकृयामा सहभागि गराइएको थियो । जसमा लगानीकर्तालाई न्यूनतम १० देखि अधिकतम १८० कित्तासम्म सेयर बाँडफाँड गरिएको छ ।

कम्पनीले जारी गरेको सेयर खरिदका लागि परेको आवेदन संख्या र बिक्री खुला भएको सेयर सङ्ख्याका आधारमा औसतमा ९३.५६ कित्ता हुने देखिएपनि धेरै आवेदकले न्यून संख्यामा सेयर माग गरेकाले अधिकतम १८० कित्तासम्म सेयर प्राप्त गर्ने अवस्था बनेको हो । कम्पनीको आईपीओमा न्यूनतम १० कित्ता र अधिकतममा ३ लाख कित्तासम्मका लागि आवेदन दिन सकिने व्यवस्था थियो ।

यस्तै म्युचुअल फन्डका लागि छुट्टाइएको १५ लाख कित्ता सेयर पनि १४ वटा म्युचुअल फन्डलाई बाँडफाँड गरिएको छ ।

हिमालयन रि–इन्स्योरेन्स निजी क्षेत्रको लगानीमा स्थापित पुनर्बीमा कम्पनी हो । कम्पनीले जारी पूँजी १० अर्ब रुपैयाँ बराबरको ३० प्रतिशतका दरले ३ अर्ब रुपैयाँ बराबरको ३ करोड कित्ता सेयर जारी गर्न अनुमति पाएको थियो । सोमध्ये पहिलो चरणमा कम्पनीले वैदेशिक रोजगारीमा रहेका नेपालीहरुले ३० लाख कित्ता बिक्री खुला गरेको हो । यस्तै कम्पनीले कम्पनीमा कार्यरत कर्मचारीहरुका लागि ६ लाख कित्ता, सामूहिक लगानी कोषका लागि १५ लाख कित्ता सेयर छुट्याएको छ ।

आईपीओ निष्काशनका लागि गराएको रेटिङ्गमा इक्रा नेपालले कम्पनीलाई इक्राएनपी इस्यूअर रेटिङ्ग ए प्रदान गरेको छ । यसले कम्पनीको वित्तीय दायित्व बहन गर्ने क्षमता पर्याप्त रुपमा सुरक्षित रहेको संकेत गर्दछ । कम्पनीको सेयर निष्काशन तथा बिक्री प्रबन्धक एनएमबि क्यापिटल लिमिटेड रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ।