आठ उपसूचक ऋणात्मक बन्दा नेप्सेमा दोहोरो अंकको पहिरो

शेयर बजार परिसूचक नेप्सेमा साताको पहिलो कारोबार दिन आइतबार दोहोरो अंकको गिरावट आएको छ। करेक्शनको क्रममा रहेको नेप्से आइतबार १६.७१ अंकले तल झरेको हो । पछिल्लो चार कारोबार दिनमा सूचक ३६.८२ अंकले ओरालो लागेको छ ।

बजार खुलेदेखि नै ओरालो लागेको नेप्सेले १२ बजेपश्चत २ बजेसम्म केही सम्हालिन खोजेपनि अन्तत अझ घटेर बन्द भएको हो। यससँगै नेप्से १२७७.६८ अंकमा झरेको छ । क वर्गका कम्पनीहरुको कारोबार मापन गर्ने सेन्सेटिभ इण्डेक्स ३।८६ अंकले घटेर २७३.९६ अंकमा ओर्लिएको छ ।

आइतबार १७५ कम्पनीका २३ लाख १२ हजार ५३० कित्ता शेयर ६५ करोड ३ लाख रुपैयाँमा खरिद बिक्री भए । सूचक ठूलो अंकले घटेपनि अघिल्ला दिनको तुलनामा कारोबार रकममा भने ७ करोड २५ लाखले सुधार आएको छ । गत बिहीबार ५७ करोड ७८ लाखको कारोबार भएको थियो।

कारोबारमा आएका दश उप सूचकमध्ये वाणिज्य बैंक सहित आठ उपसमुहमा गिरावट आउँदा समग्र नेप्से धरासायी बनेको हो ।

उत्पादन र अन्य उप समूह मात्र सकारात्मक रह्यो । जलविद्यु्त सबैभन्दा धेरै ४ प्रतिशत बढीले घटेको बजारमा वाणिज्य बैंक, विकास बैंक, होटल, जीवन बीमा र लघुवित्तको इन्डेक्स पनि एक प्रतिशत बढीले ऋणात्मक बनेको छ । उत्पादन ०.९६ र ०.१६ प्रतिशतले सकारात्मक रह्यो।

आइतबार वाणिज्य बैंकहरुको अधिक शेयर कारोबार भएको छ । शिर्ष १० कम्पनीको सूचीमा ८ वाणिज्य बैंक छन् ।

मल्टिपर्पोज फाइनान्सको सबैभन्दा धेरै दश प्रतिशतले शेयरमूल्य बढेको बजारमा युनाइटेड फाइनान्स, शिवम् सिमेन्टस्को शेयरमूल्य ४ प्रतिशत धेरैले बढेको हो । आइतबार २७ वटा कम्पनीहरुको मात्र शेयर मूल्य बढेको छ ।

उता चिलिमे हाइड्रोपावरको शेयरधनीले सबैभन्दा धेरै ७.६३ प्रतिशतले आइतबारको बजारबाट गुमाएका छन् ।

तेस्रो त्रैमासिक वित्तीय विवरणको प्रभाव कम्पनीको शेयरमूल्यमा देखिएको हो । एनआईबिएल समृद्धि फण्ड , अरुण भ्याल्ली हाइड्रोपावरको शेयरमूल्य ७ प्रतिशत धेरै घटेको छ ।