नेपालको सहरी क्षेत्र विकासका लागि एडिबीको झण्डै २२ अर्ब ऋण सहयोग

एशियाली विकास बैंकले नेपालको सहरी क्षेत्र विकासका लागि १६ करोड ६० लाख अमेरिकी डलर अर्थात् २१ अर्ब ९२ करोड ५३ लाख नेपाली रुपैयाँ बराबरको ऋण सहयोग स्वीकृत गरेको छ ।

जलवायु परिवर्तनको उच्च जोखिममा रहेको नेपालका विभिन्न सहरहरु प्राकृतिक प्रकोप र जलवायु परिवर्तनले निमत्याएको असरहरु भोगिरहेका छन् । ती सहरहरुको अनुकूलन क्षमता वृद्धि गर्न र दिगो पर्यटन पूर्वाधारको विकास गरी स्थानीय अर्थतन्त्र सबल बनाउन सहयोग गर्ने उद्देश्यले एडिबीले उक्त ऋण सहयोग गरेको जनाएको छ ।

‘अर्वान रिजिलियन्स एन्ड लाइभेबीलिटी इम्प्रुभमेन्ट’ परियोजना अन्तर्गत देवदेह, लुम्बिनी सांस्कृतिक, सैनामैना, सिद्धार्थनगर, तिलोत्तमा नगरपालिकाका साथै पोखरा महानगरपालिका र जनकपुर महानगर पालिकाका विभिन्न स्थानहरुको विकास तथा प्रवद्र्धनका लागि एडिबीबाट प्राप्त ऋण सहयोग लागु हुनेछ ।

एडिबीको यस सहयोगले नेपाल सरकारले सुरुवात गरेको राष्ट्रिय सहरी विकास रणनीतिमा थप सहायत गर्ने र सरकारले अघि बढाएका दिगो विकासको लक्ष्य प्राप्तिका लागि थप मदत पुग्ने एडिबीका परिष्ठ सहरी विकास विज्ञ लक्ष्मी शर्माले बताएकी छिन् ।

यस परियोजनाले वर्षायामको समयमा सहरी क्षेत्रमा देखिने ड्रेनेजको समस्या समाधान गर्न १५० किलोमिटर स्ट्रमवाटर डे«नेज, १०० किलोमिटर सडक निर्माण र ४५ किलोमिटरको अपाङ्ग तथा बालबालिका मैत्री फुटपाथ निर्माण गर्ने उद्देश्य लिएको छ । यसका साथै परियोजनाले साइकल लेनको निर्माण समेत गर्नेछ ।

परियोजनाले नगरपालिकाहरुको क्षमता विकास गर्नुका साथै सहरी क्षेत्रको अनुकूलन क्षमता वृद्धि गर्ने, इकोसिस्टमको व्यवस्थापन गर्ने र महिला तथा पिछडिएका समूहहरुलाई सीपमूलक तालिम प्रदान गरी आयआर्जन गर्न सघाउने लक्ष्य लिएको छ ।

एशियाली विकास बैंकको ऋण सहयोग अन्तर्गत ६० लाख डलर ७९ करोड २४ लाख ८१ हजार बराबरको अनुदान समेत समावेश छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।