गोर्खाज फाइनान्सले सर्वाधिक नाफा कमाउँदा प्रोगेशिभ सबैभन्दा खराबमा, अन्यको कस्तो ?

नेप्सेमा सूचीकृत १५ ओटै फाइनान्स कम्पनीले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण सार्वजनिक गरेका छन् । समीक्षा अवधिमा दश कम्पनीले ३८ करोड २७ लाख ७८ हजार रुपैयाँ नाफा कमाउँदा पाँच कम्पनीले २९ करोड ६५ लाख ३६ हजार रुपैयाँ नोक्सानी ब्यहोरेका छन् । समग्रमा फाइनान्सहरुको नाफा ८ करोड ६२ लाख ४१ हजारमा सीमित भएको छ ।

अघिल्लो आव २०७९–८० को ६ महीना अवधिमा बाह्र कम्पनीले ३८ करोड ५० लाख ८३ हजार रुपैयाँ नाफा कमाएका थिए । सो अवधिमा तीन कम्पनीलको नोक्सानी १२ करोड ८८ लाख ९१ हजार रुपैयाँ थियो । उक्त अवधिमा फाइनान्सहरुको कुल नाफा २५ करोड ६१ लाख ९२ हजार रुपैयाँ कायम थियो । समीक्षा अवधिमा फाइनान्सहरुको नाफा समग्रमा ६६.३४ प्रतिशतले घटेको हो ।

रिपोर्ट अनुसार अघिल्लो आवको पुसको तुलनामा ७ फाइनान्सले आफ्नो वित्तीय अवस्था केही सुधार गरेका छन् भने ८ ओटाको अवस्था अझै खस्किएको छ । चालु आर्थिक वर्षको ६ महीनासम्ममा गोर्खाज फाइनान्सको मुनाफा सबैभन्दा धेरै १२ करोड १६ लाख ५ हजार रुपैयाँ रहेको छ । जुन गत आर्थिक वर्षको मुनाफा भन्दा ८१.०७ प्रतिशत बढी हो । कम्पनीले २०७९ पुससम्म ६ करोड ७१ लाख ५७ हजार रुपैयाँ मात्र खुद नाफा कमाएको थियो ।

गोर्खाजपछि मञ्जुश्री फाइनान्सले १० करोड ५४ लाख ७१ हजार रुपैयाँ खुद नाफा कमाएको छ । फाइनान्सको यो खुद नाफा पनि २०७९ पुसमा कमाएको रकमभन्दा २२.७५ प्रतिशत कम हो । चालु आर्थिक वर्षको तेस्रो धेरै नाफा कमाउने फाइनान्स कम्पनी आइसिएफसि रहेको छ । कम्पनीको मुनाफा ५ करोड ३२ लाख २२ हजार रुपैयाँ रहेको छ । जुन गत आर्थिक वर्षको भन्दा ३५.८९ प्रतिशतले धेरै हो ।

त्यस्तै, चालु आर्थिक वर्षको दोस्रो त्रैमाससम्ममा पोखरा फाइनान्सको खुद नाफा १८.३३ प्रतिशतले घटेर २ करोड ९० लाख ५४ हजार रुपैयाँ कायम भएको छ । यस्तै श्री इन्भेष्टमेन्ट फाइनान्सले २ करोड ५६ लाख ४४ हजार रुपैयाँ, नाफा आर्जन गरेको छ । यो नाफा अघिल्लो पुसको तुलनामा २३.६६ प्रतिशत बढी हो । समीक्षा अवधिमा गुडविल फाइनान्सको खुद नाफा पनि ५१.२५ प्रतिशतले घटेर २ करोड २८ लाख ८५ हजार रुपैयाँ कायम भएको छ । पुससम्मममा मल्टीपर्पस फाइनान्सको खुद नाफा १ करोड १२ लाख ४९ हजार रुपैयाँ छ । अघिल्लो पुससम्म २३ लाख ३१ हजार रुपैयाँ नाफा कमाएको फाइनान्सले ३८२.५८ प्रतिशतले नाफा बढाएको हो । यस्तै बेष्ट फाइनान्सले पनि ११.८१ प्रतिशतले नाफा वृद्धि गर्दै २०८० पुससम्ममा १ करोड ८ लाख ४७ हजार रुपैयाँ खुद नाफा आर्जन गरेको छ ।

तथ्याङ्क अनुसार जानकी फाइनान्सको नाफा १९ लाख ८६ हजारमा सीमित भएको छ । अघिल्लो पुससम्म १ करोड ४५ लाख ४२ हजार रुपैयाँ नाफा कमाएको फाइनान्सको नाफा ८६.३८ प्रतिशतले घटेको हो । नेपाल फाइनान्सको नाफा पनि ४७ लाख ३१ हजारबाट ८२.८३ प्रतिशतले घटेर ८ लाख १२ हजार रुपैयाँ कायम भएको छ ।

पाँच फाइनान्सको मुनाफा ऋणात्मक

चालु आर्थिक वर्षको पुस मसान्तसम्ममा पाँच ओटा फाइनान्सले २९ करोड ६५ लाख ३६ हजार रुपैयाँ नोक्सानी ब्यहोरेका छन् ।  समीक्षा अवधिमा प्रोगेशिभ फाइनान्सले सबैभन्दा धेरै १० करोड ५७ लाख ५० हजार रुपैयाँ नोक्सानी ब्यहोरेको छ । अघिल्ले आवमा पनि फाइनान्सको नाफा १ करोड ३० लाख ऋणात्मक रहेको थियो ।

यसैगरी चालु आर्थिक वर्षको ६ महीनामा गुहेश्वरी मर्चेन्ट बैंकिङ्ग एण्ड फाइनान्सको पनि ६ करोड ७० लाख ३० हजार रुपैयाँ खुद नोक्सानी छ । २०७९ पुसमा फाइनान्स ७२ लाख १९ हजार नाफामा थियो । त्यस्तै रिलायन्स फाइनान्स ५ करोड ४७ लाख ६५ हजार रुपैयाँ, सेन्ट्रल फाइनान्स ४ करोड ७६ लाख ४६ हजार रुपैयाँ र समृद्धि फाइनान्स २ करोड १३ लाख ४५ रुपैयाँ खुद नोक्सानीमा छन् । २०७९ पुस समान्तसम्ममा पुसमा सेन्ट्रल फाइनान्स ४ लाख रुपैयाँ नाफामा थियो भने रिलायन्स फाइनान्स ३ करोड ८४ लाख ९६ हजार र समृद्धि फाइनान्स ७ करोड ७३ लाख ७० रुपैयाँ नोक्सानीमा रहेको थियो । समृद्धि फाइनान्सले नोक्सानी घटाएको हो भने बाँकी सबैको अघिल्लो पुसको तुलनामा अवस्था खराब बनेको छ ।

कसको प्रतिसेयर आम्दानी कति ?

पुससम्ममा गोर्खाज फाइनान्सको वार्षिक प्रतिसेयर आम्दानी (इपीएस) सबैभन्दा धेरै २८.०२ रुपैयाँ रहेको छ । अघिल्लो पुसमा १५. ४७ रुपैयाँ रहेको फाइनान्सको नाफा वृद्धिसँगै १२.५५ रुपैयाँले इपीएस बढेको हो ।

यसैगरी २०८० पुससम्मको नाफाका आधारमा आइसिएफसि फाइनान्सको वार्षिक इपीएस पनि २.३ रुपैयाँले बढेर ८.९९ रुपैयाँ पुगेको छ । पोखरा फाइनान्सको ५.३७, श्री इन्भेष्टमेन्ट फाइनान्सको ५.२२, गुडविल फाइनान्सको ४.८४, मञ्जुश्री फाइनान्सको ३.६९, मल्टिपपर्स फाइनान्सको ३.६९, बेष्ट फाइनान्सको वार्षिक इपीएस २.५४ रुपैयाँ रहेको छ । जानकी फाइनान्सको २९ पैसा र नेपाल फाइनान्सको वार्षिक इपीएस २२ पैसा रहेको छ ।

पाँच फाइनान्सको नाफासँगै प्रतिसेयर आम्दानी पनि ऋणात्मक छ । प्रोगेशिभ फाइनान्सको सबैभन्दा धेरै २९.९४ रुपैयाँ ऋणात्मक रहँदा सेन्ट्रल फाइनान्सको पनि १०.०४ रुपैयाँ नकारात्मक छ । यस्तै रिलायन्स फाइनान्सको वार्षिक इपीएस ९.७७ रुपैयाँ, गुहेश्वरी मर्चेन्टको ६.६२ र समृद्धि फाइनान्सको ५.२१ पैसा ऋणात्मक छ । अघिल्लो पुसमा समृद्धि फाइनान्सको इपीएस सबैभन्दा धेरै १८.९० रुपैयाँ ऋणात्मक थियो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।