स्वाबलम्बन लघुवित्तको खुद नाफा करिब १२ करोड, खराब कर्जा झण्डै ११ प्रतिशत

स्वाबलम्बन लघुवित्त वित्तीय संस्था लिमिटेडले चालु आर्थिक वर्षको तेस्रो त्रैमाससम्म ११ करोड ८६ लाख २० हजार रुपैयाँ खुद नाफा आर्जन गरेको छ । अघिल्लो आवको यसै अवधिमा १२ करोड २ लाख ४४ हजार रुपैयाँ खुद नाफा कमाएको लघुवित्तको नाफा १.३५ प्रतिशतले घटेको हो ।

वित्तीय विवरण अनुसार लघुवित्तको चुक्ता पुँजी १ अर्ब ४५ करोड रुपैयाँ, लघुवित्तको जगेडा तथा सञ्चित कोषमा १ अर्ब ७२ करोड ५५ लाख ४९ हजार रुपैयाँ सञ्चित छ । लघुवित्तको वितरणयोग्य मुनाफा ११ करोड ५७ लाख रुपैयाँ । नाफासँगै लघुवित्तको प्रतिसेयर आम्दानी ३ रुपैयाँ ५२ पैसा घटेर १० रुपैयाँ ९१ पैसामा झरेको छ । यस्तै प्रति सेयर नेटवर्थ २१९ रुपैयाँ र मूल्य आम्दानी अनुपात ७१.१० गुणा छ ।

चैत मसान्तसम्ममा लघुवित्तले १३ अर्ब ७१ करोड रुपैयाँ निक्षेप संकलन गरी १९ करोड १८ लाख रुपैयाँ कर्जा प्रवाह गरेको छ। जुन क्रमशः ७.०८ र ४.८५ प्रतशत बढी हो । समीक्षा अवधिमा लघुवित्तको खुद ब्याज आम्दानी २.२७ प्रतिशत घटेर १ अर्ब २ करोड २७ लाख ६३ हजार रुपैयाँ कायम हुँदा सञ्चालन नाफा १.६५ प्रतिशत घटेर १६ करोड ९० लाख ७४ हजार रहेको छ । त्यस्तै, लघुवित्तको खुद फि तथा कमिशन आम्दानी ६.३५ प्रतिशत घटेर २७ करोड १६ लाख ८९ हजार रुपैयाँ रहेको छ ।

चैत मसान्तसम्म लघुवित्तको आधारदर १४.५२ प्रतिशत, कस्ट अफ फन्ड ८.६१ प्रतिशत र खराब कर्जा अनुपात १०.८८ प्रतिशत रहेको छ। खराब कर्जा वापत लघुवित्तले ३८ करोड ५७ लाख ७९ हजार रुपैयाँ जोखिम व्यवस्थामा छुट्टाएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।