वित्त कम्पनीको सेयरमा लगानीकर्ताको आकर्षण उच्च

सोमबार वित्त कम्पनीहरुको सेयरमा लगानीकर्ताको आकर्षण देखिएको छ। आइतबार १४.३३ अंकले बढेको नेप्से सोमबार स्थिर रहेपनि कम पुँजी भएका फाइनान्स कम्पनीको सेयर मूल्य भने आज उच्च वृद्धि भएको छ ।

सोमबार सर्वाधिक कारोबार हुने दश कम्पनीमा ७ ओटा फाइनान्स अटाउँदा सेयर मूल्य बढ्ने शीर्ष दशभित्र पनि ५ फाइनान्स कम्पनी छन् । धेरै फाइनान्स कम्पनीको वित्तीय अवस्था कमजोर नै रहेपनि पछिल्ला दिनमा कारोबारीहरुले फाइनान्स कम्पनीहरुको सेयर मूल्य तीब्र रुपमा उचालेका हुन् ।

सोमबार सबैजसो फाइनान्स कम्पनीको सेयर मूल्य बढेपछि वित्त उपसमुहगत सूचक ४.१७ प्रतिशतले बढेर २२२५.२६ बिन्दुमा पुगेका छ । यस्तै विकास बैंक १.६६, बैंकिङ्ग ०.२९ र म्युचुअल फन्ड ०.३८ प्रतिशतले बढेको छ । सोमबार अन्यको इन्डेक्स सर्वाधिक ०.८२ प्रतिशतले घटेको छ भने बाँकी आठ ओटाको सूचकमा पनि सामान्य गिरावट आएको छ।

सोमबार नेप्से ०.०७ अंकले बढेर १९८०.३४ बिन्दुमा पुगेको छ । ठूला कम्पनीको सूचक मापक सेन्सेटिभ इन्डेक्स ०.३२, फ्लोट इन्डेक्स ०.११ र सेन्सेटिभ फ्लोट ०.५७ प्रतिशतले बढेको छ । आज दिनभरमा दैनिक कारोबार रकम अघिल्लो दिनको तुलनामा २७ करोडले बढेर २ अर्ब ९५ करोड ९४ लाख ५८ हजार ५०१ रुपैयाँ बराबरको सेयर कारोबार भयो । ३१७ कम्पनीका ७३ लाख ४१ हजार १७७ कित्ता सेयर ४६ हजार ५११ पटक खरिद बिक्री भएको हो ।

पोखरा फाइनान्सको सेयर सर्वाधिक वृद्धि हुँदै कारोबार भएको छ । कम्पनीको प्रतिकित्ता ७३१.५० रुपैयाँका दरले कम्पनीको १७ करोड ५४ लाख ७ हजार रुपैयाँ बराबरको कारोबार भयो । यस्तै नेपाल फाइनान्सको ५३८.७० रुपैयाँमा १४ करोड ७० लाख ४१ हजार, जानकी फाइनान्सको ५१७ रुपैयाँ दरले ९ करोड ३२ लाख ९४ हजार, गोर्खाज फाइनान्सको प्रतिकित्ता ७४५.१० दरले ९ करोड ८ लाख रुपैयाँ र मल्टिपर्पस फाइनान्सको ७ करोड ५२ लाख रुपैयाँ बराबरको सेयर कारोबार भएको छ।

यसदिन पोखरा फाइनान्स र जानकी फाइनान्सको लगानीकर्ताले सर्वाधिक १० प्रतिशतले नाफा कमाएका छन् । यससँगै नेपाल फाइनान्सको ९.९८, गुराँस लघुवित्त ७.६१, सप्तकोशी डेभलपमेन्ट बैंक ६.९९, माण्डू हाइड्रोपावर ६.१७, ११% महालक्ष्मी डिबेञ्चर २०८९ को ६.१२, सिन्धु विकास बैंक ५.४८, श्री इन्भेष्टमेन्ट एण्ड फाइनान्स ५.४२ र समृद्धि फाइनान्सको सेयर मूल्य ५.११ प्रतिशतले बढेको छ।

सोमबार पिपुल्स पावर लिमिटेडको सेयर मूल्य सर्वाधिक घटेको छ। कम्पनीको सेयर ६ प्रतिशतले घटेर ६२९.८० रुपैयाँमा झरेको हो । यस्तै इष्टर्न हाइड्रोपावरको ३.१८, मेन्छियम हाइड्रेपावर ३.२१, चिरख्वा हाइड्रोपावर ३.११ र नेको इन्स्योरेन्सको २.९५ प्रतिशतले मूल्य घटेको छ ।

सोमबारको कारोबारपछि कुल बजार पुँजीकरण ३१ खर्ब ४० अर्ब ७ करोड ४६ लाख ९ हजार रुपैयाँमा समेटिएको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।