लकडाउन अवज्ञा गर्ने ३७० सवारीसाधन सोमबार बिहानै प्रहरी नियन्त्रणमा

कोरोना भाइरसको रोकथामका लागि नेपाल सरकारले लागू गरेको आदेश उल्लङ्घन गर्ने ३७० सवारीसाधनलाई प्रहरीले सोमबार नियन्त्रणमा लिएको छ । नियन्त्रणमा लिइएकोमध्ये दुईपाङ्ग्रे ३५३ वटा र १७ वटा चारपाङ्ग्रे सवारी साधन रहेका महानगरीय ट्राफिक प्रहरी महाशाखाले जनाएको छ ।

महाशाखाको टोलीले काठमाडौँ उपत्यकाका विभिन्न स्थानबाट चैत २४ गते बिहान १० बजेसम्ममा उक्त सङ्ख्यामा गाडी नियन्त्रणमा लिएको हो । अटेर गरी सवारीसाधन सञ्चालन गरेका साधनलाई नियन्त्रणमा लिएको महाशाखाका प्रवक्ता प्रहरी उपरीक्षक जीवनकुमार श्रेष्ठले जानकारी दिए ।

अत्यावश्यक सेवा र अनुमतिपत्र लिएका सवारीसाधन मात्रै चलाउन पाउने नियम कडाइका साथ पालना गर्न लगाइएको श्रेष्ठले बताए ।

सरकारले कोरोना भाइरस फैलिन नदिन चैत ११ गते मंगलबारदेखि यही चैत २५ गते राती १२ः०० बजेसम्मका लागि ‘लकडाउन’ गरेको छ । अत्यावश्यक काम बाहेक बाहिर निस्कनेहरुको सवारी प्रहरीले नियन्त्रणमा लिँदै आएको छ।