धितोपत्र बजार र बोर्ड सञ्चालन गर्न छुट्टाछुट्टै ऐन आवश्यक – बोर्ड अध्यक्ष

नेपाल धितोपत्र बोर्डका अध्यक्ष भिष्मराज ढुंगानाले धितोपत्र बजार सञ्चालन र बोर्ड सञ्चालनका लागि छुट्टाछुट्टै ऐन तर्जुमा गर्नुपर्ने आवश्यकता औल्याएका छन् ।

धितोपत्र बजार तथा नियमन सम्बन्धमा अर्थ समितिका पदाधिकारीहरुसँगको छलफलका क्रममा बोर्ड अध्यक्ष ढुंगानाले पूँजी बजारको दिगो विकासको लागि बोर्ड, नेप्से, सिडिएससीको संरचनात्मक सुधार गर्नुपर्नेमा जोड दिए ।

उनले नेप्सेमा विदेशी रणनीतिक साझेदार भित्र्याउनुपर्ने, धितोपत्र बजार सञ्चालन र बोर्ड सञ्चालनका लागि छुट्टाछुट्टै ऐन तर्जुमा गर्नुपर्ने आवश्यकता रहेको बताए । साथै उनले पूँजी बजार संवेदनशिल बजार भएको र यसको सम्बन्ध वित्तीय प्रणालीको अन्य क्षेत्रसँग पनि भएकोले सम्बन्धित निकायहरुमा समस्या समाधानका लागि अनुरोध गरेको पनि समितिलाई जानकारी गराए ।

ढुंगानाले विदेशी पूँजी परिचालन गर्न र देशमा उद्यमशीलता तथा नवप्रवर्तनलाई प्रवद्र्धन गर्न बोर्डले छिट्टै प्राइभेट इक्विटी तथा भेञ्चर क्यापिटल सञ्चालनका लागि कोष व्यवस्थापकलाई अनुमति दिनुका साथै वस्तु विनिमय बजारको पूर्वाधार विकासका लागि बोर्डले छिटै प्रक्रिया अगाडि बढाउने योजना पनि सुनाए।