विश्वभर कोरोना संक्रमितको संख्या एक करोड पुग्यो, मृत्युदर पाँच प्रतिशत

विश्वभर महामारीका रुपमा फैलिएको कोरोना भाइरसबाट संक्रमित हुने व्यक्तिको संख्या विश्वभर एक करोड नाघेको छ।

जोन्स हप्किन्स विश्वविद्यालयले सार्वजनिक गरेको पछिल्लो विवरणमा विश्वभर कोरोना भाइरसको संक्रमणबाट ५ लाख २ हजार जनाको मृत्यु भएको उल्लेख छ । करिब ५५ लाख संक्रमित व्यक्ति निको भएर अस्पतालहरुबाट डिस्चार्ज भएका छन् ।

चीनको उहानबाट उत्पत्ति भएको भनिएको यस भाइरसबाट संयुक्त राज्य अमेरिका सबैभन्दा नराम्रोसँग प्रभावित भएको छ । विश्वविद्यालयका अनुसार संयुक्तराज्य अमेरिकामा १ लाख २८ हजार जनाको मृत्यु भइसकेको छ ।

विश्वमै सबैभन्दा बढी व्यक्ति संक्रमित देखिएको अमेरिकामा हालसम्म २५ लाख ८७ हजारभन्दा बढी मानिस प्रभावित छन् । दोस्रो बढी संक्रमित भेटिएको मुलुक ब्राजिल छ । यहाँ हालसम्म १३ लाख १९ हजार व्यक्ति संक्रमित भएका र ५७ हजार बढीको मृत्यु भएको छ ।

अमेरिका, भारत, डेनमार्क र इटाली समेतका विश्वमा अति प्रभावित मुलुकहरुले कोरोनाभाइरस फैलिनेक्रम तीब्र रहेकै अवस्थामा लकडाउन खुकुलो बनाउन थालेका छन्।