नेप्सेमा सामान्य वृद्धि, दुई कम्पनीको शेयरमूल्यमा सकारात्मक सर्किट

शेयर बजार परिसूचक मापक नेप्से साताको अन्तिम कारोबार दिन बिहीबार १.२९ अंकले बढेर बन्द भएको छ । आज चालु आर्थिक वर्षको अन्तिम कारोबार दिन नेप्से सूचक १ हजार ५६२ दशमलव ४६ बिन्दुमा बन्द भएको हो ।

चालु आर्थिक वर्षको पहिलो त्रैमासको अन्तिम कारोबार दिन नेप्से परिसूचक सकारात्मक भएर बन्द भएको छ ।

बिहीबार बिहान नियमित कारोबार सुरु भएको २१ मिनेटमा नेप्से सूचक १८.३६ अंकसम्म बढेपनि त्यसपछि सूचक टिक्न नसक्दा सामान्य वृद्धिमा मात्र बन्द भएको छ । बुधबार साँझ नयाँ अर्थमन्त्रीको रुपमा नियुक्त भएको बिष्णु पौडेलको विषयलाई लिएर कारोबारीहरुले नेप्से बढाउन खोजेपनि बिक्रीचाप बढेपछि नेप्से ओरालो लाग्न थालेको थियो ।

बिहीबार १९६ कम्पनीको ४९ लाख ९४ हजार ३६७ कित्ता शेयर २३ हजार ८९ पटक खरिद बिक्री हुँदा १ अर्ब ४२ करोड ५८ हजार रुपैयाँको कारोबार भएको छ । कारोबारमा आएका बैंकिङ्ग, ब्यापार, जलविद्युत, अन्य, र म्युचुअल फण्ड उपसमूहको सूचक सामान्य बढेको छ भने होटल, विकास बैंक, वित्त, निर्जीबन बीमा, उत्पादन, लघुवित्त, जीबन बीमा उपसमूहको सूचक घटेको छ ।

• नेपाल रि-इन्स्योरेन्सको सर्वाधिक कारोबार

आज नेपाल रि इन्स्योरेन्सको सर्वाधिक कारोबार भएको छ । कम्पनीको ७ करोड ४० लाख रुपैयाँ बराबरको शेयर कारोबार भएको छ ।

यसैगरी शिवम् सिमेन्टसको ६ करोड ८४ लाख, अरुण भ्याली ५ करोड ५५ लाख, र नेपाल लाइफको ५ करोड ४८ लाख रुपैयाँको कारोबार भयो । मञ्जुश्री फाइनान्स, अरुण काबेली पावर, प्राइम कमर्सियल बैंक, एनसीसी बैंक, कुमारी बैंक र नेपाल बैंक शीर्ष कारोबार हुने दश कम्पनीभित्र समेटिएका छन् ।

• दुई कम्पनीको शेयरमूल्यमा सकारात्मक सर्किट

बिहीबारको बजारमा दुई कम्पनीको शेयरमूल्यमा सकारात्मक सर्किट लागेको छ । आज नेपाल फाइनान्स र जनरल इन्स्योरेन्स कम्पनी नेपाल लिमिटेडको शेयर करिब १० प्रतिशतले बढेको हो ।

नेपाल फाइनान्सले हकप्रद निष्काशनका लागि कार्तिक ६ गते बुकक्लोज गर्ने मिति तोकेपछि शेयरमूल्य बढेको हो भने जनरल इन्स्योरेन्सको बुधबारदेखि कारोबार सुरु भएकाले माग उच्च तथा आपूर्ति कम हुँदा शेयरमूल्य बढेको हो ।

यस्तै आज माउन्टेन हाइड्रोपावर कम्पनी, रैराङ हाइड्रोपावर, खानीखोला हाइड्रोपावर, सानिमा माई हाइड्रोपावर, लक्ष्मी उन्नति कोषको इकाई, घलेम्दी हाइड्रोपावर, नबिल इक्वीटी फण्ड, र युनाइटेड मोदी हाइड्रोपावर कम्पनीको शेयरमूल्य बढेको छ ।

• गुराँस लघुवित्तको शेयरमूल्यमा उच्च गिरावट

आजको बजारमा गुराँस लघुवित्तको शेयरमा लगानी गरेका लगानीकर्ताले सबैभन्दा धेरै गुमाएका छन् ।  आजको बजारमा लघुवित्तको शेयरमूल्य प्रतिकित्ता ५.२१ प्रतिशत अर्थात ३७ रुपैयाँ घटेर ६७३ रुपैयाँमा झरेको छ ।

यसैगरी आँखुखोला हाइड्रोपावर, नेपाल हाइड्रो डेभलोपर, युनिलिभर नेपाल लिमिटेड, एक्सेल डेभलपमेन्ट बैंक, ज्योति विकास बैंक, हिमाल दोलखा हाइड्रोपावर, अरुण भ्याली हाइड्रोपावर, गोर्खा फाइनान्स र कर्पोरेट डेभलपमेन्ट बैंकको शेयरमूल्य घटेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।