डिप्रोक्सको खुद नाफा दोब्बर, प्रतिशेयर आम्दानी २९ रुपैयाँ बढ्यो

डिप्रोक्स लघुवित्त वित्तीय संस्था लिमिटेड (DDBL) को चालु आर्थिक वर्षको प्रथम त्रैमासमा खुद नाफा दोब्बर बनेको छ । कम्पनीले आफ्नो खुद नाफा ९ करोड ५८ लाख ८१ हजार रुपैयाँबाट १०६ प्रतिशतले वृद्धि गर्दै १९ करोड ८० लाख ९३ हजार रुपैयाँ खुद नाफा आर्जन गरेको हो।

खुद नाफा बढेसँगै चुक्ता पूँजी १ अर्ब ५४ लाख ३३ हजार रुपैयाँ रहेको यस लघुवित्तको वार्षिक प्रतिशेयर आम्दानी गत आवको यसै अवधिको तुलनामा २९.२२ रुपैयाँले बढेर ७८.८१ रुपैयाँ कायम भएको छ ।

असोज मसान्तसम्ममा लघुवित्तले ५ अर्ब २५ करोड ३६ लाख रुपैयाँ निक्षेप संकलन तथा ५ अर्ब ९८ करोड ३ लाख रुपैयाँ बैंक तथा वित्तीय संस्थाबाट सापटी लिई १३ अर्ब ८१ करोड ५० लाख रुपैयाँ कर्जा लगानी गरेको छ। यसबाट लघुवित्तले ३६ करोड ३५ लाख ५ हजार रुपैयाँ खुद ब्याज आम्दानी गरेको छ ।

खराब कर्जा वापत १ अर्ब ३७ करोड २६ लाख १४ हजार रुपैयाँ सम्भावित जोखिम बापतको व्यवस्थामा छुट्याएका कारण समीक्षा अवधिमा लघुवित्तको सञ्चालन नाफा १ अर्ब १० करोड ९१ लाख ५६ हजार रुपैयाँले ऋणात्मक भएको छ । यद्यपी लघुवित्तले नोक्सानी व्यवस्थाभन्दा धेरै अर्थात १ अर्ब ४२ करोड ९१ लाख ५६ हजार रुपैयाँ खराब कर्जा उर्ठापछि लघुवित्तले नाफा दोब्बर बनाएको हो ।

पहिलो त्रैमासको अन्त्यसम्ममा लघुवित्तको जगेडा कोषमा १ अर्ब ८ करोड ३७ लाख रुपैयाँ, प्रतिशेयर नेटवर्थ २०७.७९ रुपैयाँ, कोषको लागत ७.४७ प्रतिशत, खराब कर्जा अनुपात ०.६५ प्रतिशत र मूल्य आम्दानी अनुपात १०.७७ गुणा छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।