घट्दो बजारमा पनि लघुवित्तमा आकर्षण, कारोबार रकममा भने संकुचन

साताको चौंथो कारोबार दिन बुधबार नेप्से सूचक ऋणात्मक बनेर बन्द भएको छ । आइतबार र सोमबार उच्च अंकको वृद्धि भएको बजारमा अल्पकालीन लगानीकर्ताले नाफा सुरक्षित गर्दा मंगलबारपछि बुधबार पनि नेप्सेमा सामान्य अंकको करेक्शन देखिएको हो ।

बुधबार नेप्से ६.२० अंकले घटेर २ हजार ५५ दशमलव २२ अंकमा बन्द हुँदा ५ अर्ब १४ करोड ४६ लाख ७५ हजार ५७८ रुपैयाँको कारोबार भएको छ । आज १९९ कम्पनीका १ करोड ५ लाख ५८ हजार ३९१ कित्ता शेयर ४९ हजार १५९ पटक खरीद बिक्री भएका छन् । मंगलबारको तुलनामा बुधबार कारोबार रकम ९२ करोड ४७ लाख रुपैयाँले घटेको हो ।

बुधबारको बजारमा पनि लघुवित्त कम्पनीको शेयरमा लगानीकर्ताको आकर्षण देखियो । बैंकहरुभन्दा लघुवित्त कम्पनीको लाभांश प्रस्ताव धेरै आउन थालेपछि लगानीकर्ताको रोजाइ लघुवित्त बनेको हो । कारोबारमा आएका १२ उपसमुहका सूचकमध्ये लघुवित्तको सूचक २.३४ र ब्यापार १.१८ प्रतिशतले बढ्दा बैंकिङ्ग, होटल, विकास बैंक, उत्पादन, म्युचुअल फण्डको सूचक सामान्य सकारात्मक बनेका छन् ।

उता जीबन र निर्जीबन बीमा, अन्य तथा जलविद्युत सूचक १ प्रतिशत धेरैले घट्दा वित्त पनि ऋणात्मक बनेको छ । बाह्रमध्ये ७ उपसमूहको सूचकमा हरियाली छाएको छ ।

• एनसीसी बैंकको उच्च कारोबार

आजको बजारमा एनसीसी बैंकको उच्च कारोबार भएको छ । बैंकको ३९ करोड ४३ लाख ९५ हजार रुपैयाँ बराबरको शेयर खरीद बिक्री भएको छ । नेपाल लाइफको ३१ करोड ९१ लाख र पुनर्बीमा कम्पनीको २४ करोड ३९ लाख रुपैयाँको कारोबार भयो ।

नबिल बैंक, शिखर इन्स्योरेन्स, हिमालयन डिष्टिलरी, नेपाल इन्भेष्टमेन्ट बैंक, आरएमडिसी लघुवित्त, एनआईसी एशिया बैंक, र नेपाल बैंक शीर्ष कारोबार हुने दश कम्पनीमा समेटिएका छन् । दशौं ठूलो कारोबार भएको नेपाल बैंकको ११ करोड २७ लाख रुपैयाँको शेयर कारोबार भएको छ ।

• सात कम्पनीको शेयरमूल्य सर्किट नजिक बढ्यो

आजको बजारमा ७ कम्पनीको भाउ सर्किट लाग्ने गरी बढेको छ । आज छ्याङ्दी हाइड्रोपावर, महुली सामुदायिक लघुवित्त, समीट माइक्रोफाइनान्स, नारायणी डेभलपमेन्ट बैंक, आरएमडिसी लघुवित्त, सूर्योदय लघुवित्त र आजैदेखि कारोबार सुरु भएको माउन्टेन इनर्जी नेपालको शेयरमूल्य पनि सकारात्मक सर्किट नजिक बढेको छ ।

नेपाल क्रेडिट एण्ड कमर्स बैंक (एनसीसी), साधना लघुवित्त र स्वरोजगार लघुवित्तको शेयरमूल्य पनि शीर्ष दश कम्पनीभित्र समेटिएका छन् ।

• यस्ता छन् गुमाउने कम्पनी

आजको बजारबाट एभरेष्ट इन्स्योरेन्स कम्पनीको संस्थापक र एनएमबि ५० को इकाईमूल्य ४ प्रतिशत धेरैले घटेको छ ।

यस्तै शिखर इन्स्योरेन्स, गुडबिल फाइनान्स, रिडी हाइड्रोपावर, चिलिमे हाइड्रोपावर, तारागाउँ रिजेन्सी होटल, सानिमा माई हाइड्रोपावर, पुनर्बीमा कम्पनी र सर्पोट लघुवित्तको शेयरमूल्य पनि घटेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।