१३१ अंंक घटेपछि पाँचौं कारोबार दिनमा नेप्सेमा ‘बाउन्स ब्याक’, ३० अंकले फर्कियो सूचक

शेयर बजार परिसूचक नेप्सेमा पाँचौं कारोबार दिन सोमबार ३० अंक बढीको बाउन्स ब्याक भएको छ । लगातार ४ दिन १३१ अंकले घटेको नेप्से सूचकमा सोमबार आएर ३०.३३ अंकले बढेको छ । तीन दिन सामान्य करेक्शन आएको नेप्से संसद विघटनसँगै आइतबार सबैभन्दा धेरै ९६.८८ अंकले घटेको थियो।

आज नेप्से १.५७ प्रतिशत अर्थात ३०.३३ अंकले बढेर १ हजार ९६५ दशमलव ९६ अंकमा बन्द भएको छ । सुरुवाति ४० मिनेटमा ६२ अंकले घटेको सूचक त्यसपछि फर्किएको थियो । घटेको बजारमा उच्च खरीद चाप आउँदा बजारले लय समातेको थियो ।

सोमबार २०२ कम्पनीको ६४ हजार ९३८ पटकको कारोबारबाट १ करोड २३ लाख ८२ हजार ४८२ कित्ता शेयर ६ अर्ब ६९ करोड ८८ लाख ७४ हजार ३५४ रुपैयाँमा खरीद बिक्री भएको छ ।

कारोबबारमा आएका १२ उपसमूहमध्ये ९ उपसमूहको परिसूचक बढ्दन ३ मात्र घटेको छ । उत्पादनमुलक सूचक ३.०४ प्रतिशत बढेको बजारमा अन्य, जलविद्युत, जीबन बीमा, बैंकिङ्ग, लघुवित्तको सूचक १ प्रतिशत धेरैले सुधारिएका छन् । सोमबार व्यापार उपसमूहको परिसूचक सर्वाधिक १.९३ प्रतिशत घट्दा होटल १.२० र म्युचुअल फण्ड ०.१९ प्रतिशतले घटेको छ ।

• नेपाल लाइफको उच्च कारोबार

सोमबारको बजारमा पनि नेपाल लाइफको उच्च कारोबार भएको छ । आइतबार एक अर्ब बढीको शेयर कारोबार भएको यस कम्पनीको सोमबार पनि ७२ करोड ८८ लाख रुपैयाँको शेयर कारोबार भएको हो ।

त्यस्तै नेपाल पुनर्बीमा कम्पनीको ५७ करोड ३९ लाख, एनआईसी एशिया बैंकको ४४ करोड ८० लाख र नबिल बैंकको ३१ करोड ७६ लाख बढीको शेयर कारोबार भएको छ । हिमालयन डिष्टिलरी, नागरिक लगानी कोष, नेपाल टेलिकम, शिवम् सिमेन्टस्, एनसीसी बैंक र प्रभु बैंकको उच्च कारोबार भएको छ ।

• एनआईसी एशिया बैंकको शेयर सकारात्मक सर्किट

सोमबार एनआईसी एशिया बैंकको शेयरमूल्य सकारात्मक सर्किट लागेको छ । बैंकको शेयरमूल्य ९.९० प्रतिशत अर्थात ७० रुपैयाँ बढेर ७७७ रुपैयाँमा कारोबार बन्द भएको छ ।

एनएमबि माइक्रोफाइनान्स ६.२२ प्रतिशत, कालिका पावर ५.८२ प्रतिशत, र शिवम् सिमेन्टस्को ५.५.३६ प्रतिशतले शेयरमूल्य बढेको छ । राधी विद्युत कम्पनी, लिवर्टी पावर, अपर तामाकोशी, बरुण हाइड्रोपावर, प्रभु बैंक र बिशाल बजार कम्पनीको शेयरमूल्य ४ प्रतिशत धेरैले बढेका छन् ।

• नारायणी डेभलपमेन्ट बैंक र युनाइटेड इदी मार्दीको शेयर नकारात्मक सर्किट

हकप्रदमा उचालिएको नारायणी डेभलपमेन्ट बैंक र आइतबारदेखि दोस्रो बजारमा शेयर कारोबार खुलेको युनाइटेड इदी मार्दीको पहिलो दिन सकारात्मक सर्किट लागेर कारोबार भएकोमा दोस्रो दिन भने शेयरमूल्यमा नकारात्मक सर्किट लागेको छ ।

नेपाल हाइड्रो डेभलोपर, एभरेष्ट बैंक (कन्भर्टिबल प्रिफरेन्स शेयर), स्वाभिमान लघुवित्त, तारागाउँ रिजेन्सी होटल, बेष्ट फाइनान्स, साल्ट ट्रेडिङ्ग, बोटलर्स नेपाल तराई र रसुवागढी हाइड्रोपावरको शेयरमूल्य घटेको छ ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।