तीब्र उतार चढावका बीच नेप्सेमा १६ अंकको बढोत्तरी, बजार पूँजीकरण ३३ खर्ब नजिक

शेयर बजार परिसूचक मापक तीब्र उतार चढावका बीच सोमबार नेप्सेले १६.०४ अंकले बढेर ऐतिहासिक उचाइ चुमेको छ । बजारको सुरुवाती पाँच मिनेटबाटै अल्पकालीन लगानीकर्ताले नाफा सुरक्षित गर्नतर्फ लाग्दा उच्च बिक्रीचापका कारण घटेको नेप्से १२ बजेर ५४ मिनेटमा इन्ट्रा डे को सबैभन्दा न्यून बिन्दु २४०९.६२ बिन्दुसम्म झरेको हो । त्यसपछि लयमा फर्केको बजार २४४०.८७ को बिन्दुमा पुगेर बन्द भएको छ ।

यसदिन २०८ कम्पनीका १ करोड ९२ लाख ८५ हजार ५०४ कित्ता शेयर ७२ हजार ७७३ पटक कारोबार आउँदा कारोबार रकम ८ अर्ब ९० करोड ३५ लाख पुगेको छ । ठूला कम्पनीहरुको सूचप मापक सेन्सेटिभ इन्डेक्स ०.२४ अंकले घटेर ४५१.८२ बिन्दुमा झरेको छ ।

नेप्सेमा आएको उच्च सुधारसँगै लगानीकर्ताको सम्पत्ति मापक सूचक कुल बजार पूँजीकरण ३२ खर्ब ८७ अर्ब रुपैयाँ पुगेको छ । यो देशको कुल ग्राहस्थ उत्पादनको ८७ प्रतिशत हो ।

• ब्यापारमा आकर्षण

सोमबारको शेयर बजारमा लगानीकर्ताहरु व्यापारमा आकर्षित भएका छन् । ब्यापारमा सूचीकृत बिशाल बजार कम्पनी र साल्ट ट्रेडिङ दुबैको मूल्यमा सुधार आएपछि उक्त उपसमुहको सूचक ३.१४ प्रतिशतले बढेर २९८४.९४ मा पुगेको छ ।

यस्तै अन्य र बैंकिङ्ग उपसमहुका सूचक १ प्रतिशत धेरैले बढ्दा निर्जीवन बीमा कम्पनी र म्युचुअल फण्डको सूचक समान्य सुधारिएका छन् । उता लघुवित्त र होटलको सूचक १ प्रतिशत बढीले ऋणात्मक रहँदा विकास बैंक, जलविद्युत, वित्त, जीवन बीमा र उत्पादनमुलक सूचक पनि ऋणात्मक बनेका छन् ।

• नेपाल लाइफको सर्वाधिक कारोबार

सोमबारको बजारमा नेपाल लाइफ इन्स्योरेन्सको सर्वाधिक कारोबार भएको छ । ५० रुपैयाँको तलमाथिको मूल्यमा कारोबार भएको कम्पनीको शेयर अन्तिममा स्थीर बनेर बन्द भएको छ । यसदिन नेपाल लाइफको मात्रै ६० करोड ३७ लाख ४० हजार रुपैयाँ बराबरको कारोबार भएको छ ।

यसगरी नबिल बैंक ३३ करोड, एनसीसी बैंक ३१ करोड, एनआईसी एशिया बैंक २९ करोड, नेपाल बैंक २८ करोड, पुनर्बीमा कम्पनीको २३ करोड र कुमारी बैंकको २२ करोड रुपैयाँ बढीको शेयर कारोबार भएको छ । शिखर, नेशनल लाइफ र नेको इन्स्योरेन्सको शीर्ष दश ठूलो कारोबार भएको छ ।

• ६ कम्पनीको शेयरमूल्यमा सकारात्मक सर्किट ब्रेक

सोमबार कारोबारमा आएका २०८ मध्ये ६ वटा कम्पनीको शेयरमूल्यमा सकारात्मक सर्किट लागेको छ ।

नागरिक लगाानी कोष, गुँरास लघुवित्त, प्रभु लाइफ इन्स्योरेन्स, माउन्टेन इनर्जी नेपाल, नेशनल हाइड्रोपावर र हिमालयन पावर पार्टनरको शेयरमूल्यमा सकारात्मक सर्किट लागेको हो ।

यसैगरी गोर्खाज फाइनान्स, राष्ट्रिय बीमा कम्पनी, एनआरएन इन्फ्रास्टक्चर एण्ड डेभलपमेन्ट, र नेपाल बैंकको शेयरमूल्य पनि ७ प्रतिशत बढीले सुधारिएको छ ।

• श्री इन्भेष्टमेन्ट फाइनान्सको मूल्य धेरै घट्यो

सोमबार श्री इन्भेष्टमेन्ट फाइनान्सको शेयरमा लगानी गरेकाले सबैभन्दा धेरै ६.९८ प्रतिशतले गुमाएका छन् । सिन्धु विकास बैंक, प्रोगेशिभ फाइनान्स, र ग्रामीण विकास लघुवित्तको शेयरमूल्य पाँच प्रतिशत धेरैले घटेको छ ।

यसैगरी नेपाल फाइनान्स, सामुदायिक लघुवित्त, सर्पोट माइक्रोफाइनान्स, सबैको लघुवित्त, बेष्ट फाइनान्स र कर्पोरेट डेभलपमेन्ट बैंकको शेयरमा लगानी गरेका लगानीकर्ताले पनि गुमाएका छन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।