नारायणी डेभलपमेन्ट बैंकले थप २०० प्रतिशत हकप्रद बेच्ने प्रस्ताव पारित गर्दै

नारायणी डेभलपमेन्ट बैंक लिमिटेड (NABBC) ले शुक्रबारको १९ औं वार्षिक साधारण सभाबाट थप २०० प्रतिशत (एक बराबर दुई अनुपातमा) हकप्रद बिक्री गर्ने प्रस्ताव पारित गर्ने भएको छ ।

समस्याग्रस्त संस्थाबाट मुक्ता भई तंग्रदै गरेको बैंकले लाभांश वितरण गर्नसक्ने अवस्था नहुँदा विद्यमान शेयरधनीलाई हकप्रदमाथि पुन हकप्रद बिक्री गरेर पूँजी कायम गर्ने भएको हो । बैंकले हाल एक बराबर एक अनुपातमा हकप्रद शेयर बिक्री गरिरहेको छ । बोनस वितरण गर्ने क्षमता नहुँदा शेयरधनीबाट रकम उठाएर राष्ट्र बैंकले तोकेको न्यूनतम चुक्ता पूँजी कायम गर्ने भएको हो ।

बैंकको पुस २१ गते मंगलबार सम्पन्न सञ्चालक समितिको बैठकले स्टार ब्याङक्वेट, रत्ननगर, चितवनमा दिउँसो १ बजे १९औं वार्षिक साधारण सभा बोलाएको छ ।

बैंकको सभाले हाल बिक्री गरिरहेको १०० प्रतिशत हकप्रद बिक्रीपछि कायम हुने १३ करोड १२ लाख ३३ हजार ८०० रुपैयाँ चुक्ताको १ः२ अनुपातमा हकप्रद जारी गर्ने र नारायणी डेभलपमेन्ट बैंक र अन्य कुनै बैंक तथा वित्तीय संस्थासँग प्राप्ति गर्ने वा एकआपसमा गाभ्ने/गाभिने प्रयोजनका लागि सम्पूर्ण कार्य गर्न सञ्चालक समितिलाई अख्तियारी प्रदान गर्ने विशेष प्रस्तावमाथि छलफल गरी पारित गर्ने एजेण्डा राखेको छ ।

बैंकले साधारण सभा प्रयोजनका लागि पुस २९ गते बुकक्लोज गरेकोले २८ गतेसम्म नेप्सेमा कारोबार भई कायम शेयरधनीहरुले मात्र साधारण सभामा भाग लिन पाउनेछन् ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।