उपत्यकामा जेठ मसान्तसम्म निषेधाज्ञा थप्ने तयारी

काठमाडौं उपत्यकामा थप जेठ मसान्तसम्म निषेधाज्ञा जारी थप्ने तयारी भएको छ ।

काठमाडौं, ललितपुर र भक्तपुरका प्रमुख जिल्ला अधिकारीहरूबीच मंगलबार भएको छलफलमा जारी निषेधाज्ञालाई केही खुकुलो बनाएर १० दिन थप्ने निष्कर्ष निकालिएको हो ।

भक्तपुरका प्रमुख जिल्ला अधिकारी प्रजिअ प्रेमप्रसाद भट्टराईले जिल्ला संकट व्यवस्थापन केन्द्रको बैठक बसेपछि तीन जिल्लाका सीडिओबीच छलफल भएपनि निषेधाज्ञा थप्ने आदेश भने भोलिमात्रै जारी हुने बताए ।

भट्टराईका अनुसार जेठ २१ गतेदेखि थपिने निषेधाज्ञा अवधिमा विद्यमान व्यवस्थालाई केही खुकुलो बनाइनेछ ।  प्रशासनले खाद्यान्न तथा तरकारीका पसल बिहान खोल्न दिने र सुरक्षाका मापदण्ड पालना गरी कार्यस्थलमा नै कामदारहरूलाई राखेर विकास निर्माणको काम पनि सुचारु गरिने उनको भनाई छ ।

कोरोना भाइरस संक्रमणको चेन ब्रेक गर्न भन्दै प्रशासनले गत बैशाख १६ गतेदेखि उपत्यकामा निषेधाज्ञा लगाइएको थियो ।

समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।