जारी निषेधाज्ञाबीच सरकारले फेरि बढायो पेट्रोलियम पदार्थको मूल्य

डेढ महिना लामो निषेधाज्ञाका कारण आम्दानीको बाटो सुकेर दैनिक छाक टार्न मुस्किल परेका उपभोक्ताको ढाड सेकिने गरी सरकारले फेरि पेट्रोलियम पदार्थको मूल्य वृद्धि गरेको छ । 

नेपाल आयल निगमले शनिबार रातिदेखि लागू हुने गरी पेट्रोल, डिजेल, मट्टितेल र हवाइ इन्धनको मूल्य प्रतिलिटर २/२ रूपैयाँले वृद्धि गरेको हो । जारी निषेधाज्ञाबीच यसअघि निगमले जेठ २ गते मात्रै पेट्रोल, डिजेल, मट्टितेल र हवाइ इन्धनको मूल्य प्रतिलिटर २/२ रूपैयाँले मूल्य बढाएको थियो । जारी निषेधाज्ञाबीच १६ दिनमा नै मूल्य बढाइएको हो ।

नयाँ मूल्यसूची अनुसार पेट्रोलको मूल्य प्रतिलिटर १२५ रूपैयाँ पुगेको छ भने डिजेल र मट्टितेलको मूल्य प्रतिलिटर १०८ रूपैयाँ पुगेको छ । हवाइ इन्धन आन्तरिकतर्फको नयाँ मूल्य प्रतिलिटर ८० रूपैयाँ तोकिएको छ ।

नेपाल आयल निगमले कोरोनाका कारण उपभोग कम भैरहेको भएपनि इडिन्यन आयल निगमबाट मूल्य बढेर निगमलाई १५ दिनमै १ अर्ब १० करोड घाटा हुने अवस्था आएपछि मूल्य वृद्धि गर्नुपरेको जनाएको छ । जेठ १८ गतेको मूल्य अनुसार पनि निगमलाई १५ दिनमा ९३ करोड नोक्सानी रहेको निगमले जनाएको छ ।

मूल्यवृद्धि पश्चात पनि निगमलाई पेट्रोलमा ५.३२ रुपैयाँ, डिजेलमा ३.१७ रुपैयाँ र एलपिजी ग्याँसमा २५८.४६ रुपैयाँ गरी १५ दिनमा ५९ करोड २८ लाख घाटा छ जसमध्ये ग्यासमा मात्रै निगमलाई १५ दिनमा ३८ करोड । डिजेलमा १८ करोड रूपैयाँ घाटा हुने देखिन्छ । यसलाई मूल्य स्थीरिकरण कोष तथा निगमको सञ्चित नाफाबाट ब्यहोरिने उल्लेख छ ।

अन्तराष्टिय बजारमा निरन्तर बढिरहेको कच्चा तेलको मूल्य एवं अमेरिकी डलरको तुलनामा नेपाली रुपैयाँ अवमूल्यन हुनेक्रम जारी रहे आगामी दिनमा पनि भाउ बढाउनुपर्ने बाध्यता रहेको निगमको भनाई छ ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।