नेशनल माइक्रोफाइनान्समा विलिन हुँदै महिला सहयात्रा लघुवित्त

नेशनल माइक्रोफाइनान्स र महिला सहयात्रा लघुवित्तको आज हुने विशेष साधारण सभाले एक आपसमा गाभिने प्रस्ताव पारित गर्दै छन् । नेशनल माइक्रोफाइनान्सले महिला सहयात्रालाई प्राप्ति गरे पश्चात दुई संस्था एक हुने छन् ।

महिला सहयात्रा लघुवित्तको १०० कित्ता शेयर बराबर नेशनल माइक्रोफाइनान्सको ६८ कित्ता शेयर अनुपातमा नेशनल माइक्रोफाइनान्सले महिला सहयात्रालाई प्राप्ति गर्न लागेको हो ।

प्राप्ति लगायतका प्रस्ताव पारित गर्न मंगलबार दुबै कम्पनीले छुट्टा – छुट्टै स्थानमा साधारण सभा गर्न गर्दैछन् । नेशनल माइक्रोफाइनान्सले केन्द्रीय कार्यालय धादिङमा बिहान ११ बजे र महिला सहयात्राले कम्पनीको केन्द्रीय कार्यालय मकवानपुरमा बिहान ११ बजे साधारण सभा राखेका छन् । सभा भर्चृअल माध्यमबाट हुने कम्पनीले जानकारी दिएका छन्।

दुबै कम्पनीको विशेष साधारण सभा प्रयोजनको लागि शेयरधनी दर्ता पुस्तिका जेठ १७ गते बन्द भएको छ । यस आधारमा जेठ १६ गतेसम्म कायम शेयरधनी साधारण सभामा भाग लिन सक्नेछन् ।

सभाले प्राप्तिपश्चात संस्थाको जारी पूँजी तथा चुक्ता पूँजी वृद्धि हुने हुँदा सोहीअनुसार संस्थाको प्रबन्धपत्र संशोधन गरिने विशेष प्रस्ताव पनि अनुमोदन गर्नेछ।

नेशनल माइक्रोफाइनान्स वित्तीय संस्था लिमीटेडले २०७७ माघ ८ गते महिला सहयात्रा लघुवित्तलाई प्राप्ति गर्ने सहमति गरेको थियो । नेशनल माइक्रोफाइनान्सको चुक्तापूँजी २६ करोड ४० लाख रुपैयाँ छ । जसले ४३ वटा जिल्लाका ६५ वटा शाखा कार्यालयबाट वित्तीय सेवा प्रदान गर्दै आएको छ भने महिला सहयात्रा लघुवित्तको चुक्तापूँजी ११ करोड छ। जसले विभिन्न १८ जिल्लामा सेवा दिँदै आएको छ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।