निषेधाज्ञा उल्लंघनमा चन्द्रागिरी हिल्स रिसोर्टसँग स्पष्टिकरण माग

नेपाल उद्योग वाणिज्य महासंघका बरिष्ठ उपाध्यक्ष चन्द्र ढकालको लगानी रहेको चन्द्रागिरी हिल्स रिसोर्टले निषेधाज्ञा उल्लंघन गरेको आरोपमा काठमाडौं जिल्ला प्रशासनले चन्द्रागिरी हिल्स रिसोर्टसँग स्पष्टिकरण मागेको छ ।

उपत्यकामा दिनप्रतिदिन बढ्दो कोभिड संक्रमणकाबीच माधव नेपाल नेतृत्वको एकीकृत समाजवादी पार्टीको बैठकमा १०० भन्दा बढीलाई सहभागि गराएपछि जिल्ला प्रशासन कार्यालय काठमाडौंले रिसोर्टलाई स्पष्टिकरण मागेको हो ।

निषेधाज्ञाका प्रावधान विपरीत मानिसको भीडभाड हुनेगरी सभा सम्मेलन जस्ता गतिविधि सञ्चालन गरेको विषयमा रिसोर्टसँग स्पष्टीकरण सोधिएको हो ।

माधव नेपाल नेतृत्वको एकीकृत समाजवादी बैठक सोमबारदेखि चन्द्रागिरि हिल्स रिसोर्टमा चलिरहेको छ ।

माधव नेपाल नेतृत्वको प्रस्तावित नेकपा (एकीकृत समाजवादी) पार्टीको केन्द्रीय कमिटीको बैठकमा घोषणापत्र र विधानमाथि समूहगत छलफल पनि चलिरहेको छ । बैठकले पार्टीको घोषणापत्र र विधान टुंगो लगाउने बताइएको छ ।
एमालेको केन्द्रीय कमिटीको ३० प्रतिशत संख्या र्पुयाउने प्रयासमा रहेको नेपाल समूहमा १९३ केन्द्रीय सदस्यमध्ये ६१ जना खुलेको बताइन्छ । एकिकृत समाजवादीले १५१ सदस्यीय केन्द्रीय कमिटी बनाउने प्रस्ताव गरेको छ । त्यसमा ७ जना उपाध्यक्ष एकजना वरिष्ठ नेता, महासचिव, २ जना उपमहासचिव र ७ जना सचिव बनाउने प्रस्ताव गरिएको छ ।

रिसोर्टमा उद्योग वाणिज्य महासंघका बरिष्ठ उपाध्यक्ष चन्द्र ढकाल,ढकालको लगानी रहेको आईएमई ग्रुप र भाटभटेनी सुपर मार्केटका संस्थापक मिन बहादुर गुरुङ र सुपर मार्केट समेत संस्थापक लगानीकर्ता रहेको छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।