निर्जीवन बीमा कम्पनीको नाफा ४.६६ अर्ब, नेको इन्स्योरेन्स अग्रस्थानमा

नेपाल स्टक एक्सचेञ्ज (नेप्से) मा सूचीकृत १८ निर्जीवन बीमा कम्पनीहरुले गत आर्थिक वर्षको चौथो त्रैमाससम्ममा ४ अर्ब ६५ करोड ९८ लाख रुपैयाँ खुद नाफा कमाएका छन् ।

ती कम्पनीहरुले सार्वजनिक गरेको आर्थिक वर्ष २०७७।७८ को चौथो त्रैमाससम्मको वित्तीय विवरण अनुसार सबैभन्दा धेरै नाफा नेको इन्स्योरेन्सले कमाएको छ । कम्पनीले उक्त अवधिसम्ममा ५४.०६ करोड रुपैयाँ खुद नाफा कमाएको छ ।

नेको पछि शिखर इन्स्योरेन्स कम्पनीले ४७ करोड ५७ लाख रुपैयाँ नाफा कमाएको छ । शिखरपछि बढी नाफा कमाउने कम्पनीमा प्रिमियर इन्स्योरेन्स, राष्ट्रिय बीमा कम्पनी, नेपाल इन्स्योरेन्स, सिद्धार्थ इन्स्योरेन्स, प्रभु इन्स्योरेन्स, एनएलजी इन्स्योरेन्स र प्रुडेन्सियल इन्स्योरेन्स अब्बल देखिएका छन् ।

उक्त अवधिसम्ममा सगरमाथा इन्स्योरेन्सले ४५ करोड, प्रिमियरले ३७ करोड, राष्ट्रिय बीमा कम्पनीले ३६ करोड, नेपाल इन्स्योरेन्सले ३४.८७ करोड, सिद्धार्थ इन्स्योरेन्सले ३०.२३ करोड, प्रभु इन्स्योरेन्सले २६.६६ करोड र एनएलजी इन्स्योरेन्सले २५.२२ करोड रुपैयाँ नाफा कमाएका छन् ।

यस्तै, आइएमइ जनरल इन्स्योरेन्सले २३ करोड रुपैयाँ, एभरेष्ट इन्स्योरेन्सले २०.३८ करोड रुपैयाँ, प्रुडेन्सियल इन्स्योरेन्सले १७.६९ करोड, लुम्बिनी जनरलले १७.२४ करोड रुपैयाँ र हिमालयन जनरल इन्स्योरेन्सले १५.५५ करोड रुपैयाँ नाफा आर्जन गरेको छ । युनाइटेड इन्स्योरेन्सले सबैभन्दा कम ७.५२ करोड रुपैयाँ नाफा कमाएको छ ।

नयाँ जीवन बीमा कम्पनी अजोड इन्स्योरेन्सले ९.५३ करोड रुपैयाँ, जनरल इन्स्योरेन्सले ९ करोड रुपैयाँ र सानिमा जनरल इन्स्योरेन्सले ८.६२ करोड रुपैयाँ नाफा कमाएका छन् ।

११ अर्ब ७६ करोड खुद बीमाशुल्क संकलन

नेप्सेमा सूचीकृत १८ निर्जीवन बीमा कम्पनीहरुले गत आर्थिक वर्षको चौथो त्रैमाससम्ममा ११ अर्ब ७६ करोड १९ लाख रुपैयाँ खुद बीमाशुल्क संकलन गरेका छन् । सबैभन्दा धेरै नाफा कमाएको नेकोले खुद बीमाशुल्क संकलन समेतमा अरु सबै कम्पनीलाई पछि पारेको छ । गत आर्थिक वर्षको चौथो त्रैमाससम्ममा नेकोले १ अर्ब ६३ करोड २८ लाख रुपैयाँ खुद बीमाशुल्क संकलन गरेकोे छ ।

नेको पछि शिखर इन्स्यारेन्सले १ अर्ब २३ करोड ५६ लाख रुपैयाँ खुद बीमाशुल्क संकलन गरेको छ ।

शिखर पछि सगरमाथा इन्स्योरेन्सले १ अर्ब २३ करोड रुपैयाँ, सिद्धार्थ इन्स्योरेन्सले ९२ करोड रुपैयाँ, एनएलजी इन्स्योरेन्सले ८९ करोड ५६ लाख रुपैयाँ, प्रिमियर इन्स्योरेन्सले ७६ करोड २४ लाख रुपैयाँ, नेपाल इन्स्योरेन्सले ७१ करोड ४२ लाख रुपैयाँ खुद बीमाशुल्क संकलन गरेका छन् ।

यस्तै, लुम्बिनी जनरल इन्स्योरेन्सले ५९ करोड ९३ लाख रुपैयाँ, आइएमई जनरल इन्स्योरेन्सले ५८ करोड ७९ लाख रुपैयाँ, र प्रुडेन्सियल इन्स्योरेन्सले ५८ करोड १६ लाख रुपैयाँ आर्जन गरेको छ ।

सानिमा जनरल इन्स्योरेन्सले भने सबै भन्दा कम १६ करोड ३४ लाख रुपैयाँ खुद बीमाशुल्क संकलन गरेको छ ।

जगेडा कोष र बीमा कोषमा राष्ट्रिय बीमा कम्पनी अगाडि

गत आवमा जगेडा कोष र बीमा कोषमा राष्ट्रिय बीमा कम्पनी सबैभन्दा अगाडि रहेको छ । राष्ट्रिय बीमा कम्पनीको जगेडा कोषमा ३ अर्ब १४ करोड र बीमा कोषमा २ अर्ब ४३ करोड रुपैयाँ सञ्चित रहेको छ ।

गत आवमा दोस्रो ठूलो जगेडा कोष रहेको नेको इन्स्योरेन्सको कोषमा ७०.०५ करोड, शिखर ५७.०२, सगरमाथा ४८.०५, एनएलजी ४६.६८, नेपाल इन्स्योरेन्स ४२.०६ र प्रिमियर इन्स्योरेन्सको जगेडा कोषमा ४० करोड सञ्चित रहेको छ । ८.७५ करोड सहित सबैभन्दा कम जगेडा कोष जनरल इन्स्योरेन्सको रहेको छ ।

बीमा कोषको आकारमा शिखर, नेको, एनएलजी, र सगरमाथा इन्स्योरेन्स अब्बल देखिएका छन् । यी कम्पनीको जगेडा कोष १ अर्बदेखि १ अर्ब २९ करोडको बीचमा रहेको छ । सानिमा जनरल इन्स्योरेन्सको बीमाकोषमा सबैभन्दा कम ९.९७ करोड रुपैयाँ सञ्चित छ ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।