सातामा नेप्से ८६.७३ अंक घट्यो, कारोबार तीन दिनमा झर्दा रकम साढे ४१ अर्बमा सीमित

दुई दिने सार्वजनिक विदाले कारोबार दिन दिनमा मात्र खुम्चँदा यो साता कारोबार रकम ५७.३४ प्रतिशतले घटेको छन् भने नेप्से सूचक पनि २.७३ प्रतिशतले घटेको छ ।

अघिल्लो साता ३१८० दशमलव ७८ बिन्दुमा रहेको नेप्से सूचक ८६.७३ अंक घटेर ३०९४ दशमलव ०५ बिन्दुमा झरेको छ ।

यस्तै अघिल्लो साता ९७.५९ अर्बको शेयर कारोबार भएकोमा यस सातामा ५५.९६ प्रतिशतले घटेर ४१.६३ अर्बमा खुम्चिएको छ ।

दैनिक कारोबार रकम १९.५२ अर्बभन्दा बढीबाट घटेर औषतमा १३.८८ अर्बको मात्र शेयर कारोबार भएको छ ।

यस साता मंगलबार र बुधबार १०४ को उच्च अंकले घटेको शेयर बजार अन्तिम कारोबार दिन साढे १७ अंकले सुधार आएको हो । नेप्से सूचकसँगै कुल बजार पूँजीकरण १ खर्ब २० अर्ब रुपैयाँ घटेर ४३ खर्ब २३ अर्ब रुपैयाँमा सीमित भएको छ । अघिल्लो साता ४४ खर्ब ४३ अर्ब रुपैयाँ रहेको थियो ।

यो साता ठूला कम्पनीको शेयर मापक सूचक सेन्सेटिभ इण्डेक्स पनि यस साता १८.७६ अंकले घटेर ५७१.३९ अंकमा झरेको छ । विद्युत नियमन आयोगले जारी गरेको विज्ञप्तीपछि जलविद्युत समुहका कम्पनीको शेयरमूल्य घटेको छ भने साताको अन्तिमतिर फेरि विकास बैंक, फाइनान्स, जलविद्यूत कम्पनीम नै फर्किएको अवस्था छ ।

कारोबारमा आएका १३ समूहमध्ये फाइनान्स ४.५७ प्रतिशत अर्थात १४२.७६ अंक बढेर ३२६८.५८ अंकमा पुगेको छ भने उत्पादनमुलक सर्वाधिक ४.३९ प्रतिशत अर्थात ३२७. १६ अंकले घटेर ७१२८.२२ अंकमा झरेको छ । जीवन बीमा र अन्य सूचक ३ प्रतिशत बढी तथा ब्यापार, बैंकिङ्ग, विकास बैंक, निर्जीवन बीमा, र जलविद्युत सूचक २ प्रतिशतभन्दा धेरैले घटेको छ ।

जीवन विकास लघुवित्तको ३३% मूल्य बढ्यो, एचआईडिसिएलको मूल्य १३% घट्यो

यस साता जीवन विकास लघुवित्तको मूल्य सर्वाधिक ३३ प्रतिशत बढेको छ । अघिल्लो साता ३९०६ रहेको लघुवित्तको मुल्य १२९३ रुपैयाँ बढेर ५१९८.९० रुपैयाँ पुगेको छ ।

यसैगरी नारायाणी डेभलपमेन्ट बैंकको मूल्य १२.७६ प्रतिशत बढेर १०३४ रुपैयाँ, आईसिएफसि फाइनान्सको मूल्य ११.९८ प्रतिशत बढेर ११५९ रुपैयाँ, गोर्खाज फाइनान्सको १०.०६ प्रतिशतले बढेर १४११ रुपैयाँ र सेन्ट्रल फाइनान्सको ९.५४ प्रतिशतले मूल्य बढेर ७९२ रुपैयाँ पुगेको छ ।

यो साता एचआईडिसिएलको मूल्य १२.९६ प्रतिशतले घटेर ४५० रुपैयाँमा घटेको छ । यसैगरी सिनर्जी पावरको ११.९१ प्रतिशतले घटेर ६१४ रुपैयाँमा झरेको छ । यस्तै खानीखोला हाइड्रोपावरको १०.८८ प्रतिशत घटेर ३९३ रुपैयाँ, हिमालयन पावर पार्टनरको १०.४३ प्रतिशत घटेर ६१० रुपैयाँमा र युनिभर्सल पावर कम्पनीको ८.७० प्रतिशतले मूल्य घटेर ५२५ रुपैयाँमा झरेको छ ।

यो साता अरुण भ्याली हाइड्रोपावरको २ अर्ब १५ करोड बढीको शेयर कारोबार भएको छ ।

तीन कम्पनीको शेयर सूचीकृत

यस साता नेपाल स्टक एक्सचेन्जमा ३ कम्पनीको शेयर सूचीकृत भएको छ । यो साता सूर्योदय लघुवित्त वित्तीयको बोनस, अपि पावरको हकप्रद र सामुहिक लगानी कोष आरविवि म्युचुअल फण्ड १ को इकाई सूचीकृत भएको छ ।

यो साता सूर्योदय लघुवित्तको १५.३५ प्रतिशत बराबरको ३ लाख ३० हजार कित्ता बोनस, अपि पावरको चुक्ता पूँजीको २९.३८ प्रतिशत बराबरको ५६ लाख ७० हजार कित्ता हकप्रद र “आरविवि म्युचुअल फण्ड १” को प्रति इकाई १० रुपैयाँका दरले १२ करोड ५० लाख इकाई नेप्सेमा सूचीकृत भएको हो ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।