इन्टरनेटको तार काट्दा आइपर्ने समस्याको जिम्मेवारी प्राधिकरणले लिनुपर्छः आइस्पान अध्यक्ष पराजुली

इन्टरनेट सेवा प्रदायक संघ (आइस्पान) का अध्यक्ष सुधिर पराजुलीले अत्यावश्यक सेवाको रुपमा रहेको इन्टरनेटको तार काट्दा आइपर्ने समस्याको जिम्मेवारी नेपाल विद्युत प्राधिकरणले लिनुपर्ने बताएका छन् ।

तराई विकास तथा सञ्चार केन्द्र नेपालले काठमाण्डौंमा आयोजना गरेको नेपालमा सूचना प्रविधिको प्रयोगको अवस्था र चुनौती विषयक कार्यक्रममा बोल्दै अध्यक्ष पराजुलीले प्राधिकरणले विद्युत पोलको भाडा बढाए आफूहरु इन्टरनेटको मूल्य बढाउन बाध्य हुने बताए ।

उनले भने, “इन्टरनेट बिना आजको समयमा केही पनि चल्दैन । हामीले नेपाल विद्युत प्राधिकरणसँग लिखित रुपमा इन्टरनेटको मूल्य नबढ्ने गरी समस्या समाधान गरौँ भनेर संवाद अगाडि बढाइरहँदा प्राधिकरण भने एकलौटी रुपमा इन्टरनेटको तार काट्छु भनेको छ । हामीलाई १५ गतेको समय दिएको छ । अबको ३ दिनमो के गर्ने ? यसबाट सेवा अवरुद्ध भएको खण्डमा त्यसको जिम्मेवारी समेत उहाँहरूले नै लिनुपर्नेछ ।”

नेपालमा अहिले चलिरहेको इन्टरनेटमा भारतका दुई ओटा कम्पनी एयरटेल र टाटाको वर्चश्व रहेकाले ती कम्पनीबाट नेपालमा आउने इन्टरनेट महँगो हुने गरेको उनले बताए । अहिले इन्टरनेट स्लो हुनुको कारण विभिन्न ठाउँमा भएको तारको समस्या रहेको पनि पराजुलीले दाबी गरे ।

कार्यक्रममा नेपाल विद्युत प्रधिकरणका कार्यकारी निर्देशक कुलमान घिसिङले बढेको पोलभाडा नघटाउने बताउँदै सेवाप्रदायकसँगको सहकार्यमा अघि बढ्न सकिने बताए ।

उनले भने ‘ अहिले हामीले पोलको नयाँ भाडदर राखेका छौँ । त्यो रेट हामीले पैसा धेरै उठाउन भनेर राखेको होइन । बढेको पोलभाडाबाट विद्युत प्राधिकरणको आम्दानी २५ करोडबाट ५० करोडमा मात्रै बढ्छ । ’

अहिले हरेक पोलमा हरेक व्यक्ति तथा संस्थाले केवल तान्ने गरेका र पोलमा रहेको ९५ प्रतिशत केवल काम नलाग्ने अवस्थामा रहेको उनले बताए । नयाँ केबलको तार टाङदा पुरानोलाई ननिकाल्ने, अव्यवस्थित पार्ने र विभिन्न घटना निम्तिने गरेको घिसिङको भनाई छ ।

धेरै सेवा प्रदायकहरुले विद्युत प्राधिकरणको पोल प्रयोग गर्दा पोल ढल्ने अवस्थामा पुगेकाले त्यस्तो स्थीति नहोस् भनेर पनि मूल्य बढाउनुपर्ने उनले जिकिर गरे । सबैले शेयरिङ गरेर केवल तार तान्नेको खण्डमा अहिलेको कस्ट भन्दा पनि सस्तो पर्ने उनले बताए ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।