आधिँखोला लघुवित्तको नाफा ४१ प्रतिशतले बढ्यो, ११ रुपैयाँ बढ्यो इपिएस

आधिँखोला लघुवित्त वित्तीय संस्था लिमिटेड ले गत आर्थिक वर्षको सोही अवधिको तुलनामा चालु आर्थिक वर्षको पहिलो त्रैमासमा ४१.४५ प्रतिशतले खुद नाफा बढाएको छ ।

लघुवित्तले असोज मसान्तसम्ममा ९३ लाख ४४ हजार रुपैयाँ खुद नाफा आर्जन गरेको हो । गत आवको यसै अवधिमा लघुवित्तले ६६ लाख ६ हजार रुपैयाँ खुद नाफा कमाएको थियो ।

चुक्ता पूँजी १० करोड रुपैयाँ रहेको लघुवित्तको नाफा बढेसँगै वार्षिक प्रतिशेयर आम्दानी पनि १०.९५ रुपैयाँले बढेर ३७.३८ रुपैयाँ पुगेको छ । लघुवित्तको जगेडा कोषमा ७ करोड ८७ लाख ८९ हजार रुपैयाँ रहेको छ ।

चालु आर्थिक वर्षको असोज मसान्तसम्ममा लघुवित्तले ३९ करोड ४८ लाख रुपैयाँ निक्षेप संकलन तथा बैंक तथा वित्तीय संस्थाबाट ६२ करोड ४० लाख रुपैयाँ सापटी परिचालन गरी १ अर्ब १० करोड ७१ लाख रुपैयाँ कर्जा लगानी गरेको छ । यसबाट लघुवित्तले १ करोड ८१ लाख ८९ हजार रुपैयाँ खुद ब्याज आम्दानी र ९६ लाख १४ हजार रुपैयाँ सञ्चालन नाफा आर्जन गरेको छ ।

समीक्षा अवधिमा लघुवित्तको चुक्ता पूँजी स्थीर रहेको छ भने जगेडा कोष ६६.२४ प्रतिशत, सापटी ४८.१६ प्रतिशत, निक्षेप २९.२९ प्रतिशत, कर्जा ३८.६६ प्रतिशत, खुद ब्याज आम्दानी १८.३० प्रतिशत, सञ्चालन मुनाफा ५.५३ प्रतिशतले बढेको छ ।

खराब कर्जा असुलीबाट लघुवित्तको नाफामा सुधार आएको हो । समीक्षा अवधिमा लघुवित्त कम्पनीले ५२ लाख खराब कर्जा असुली गरेको छ ।
लघुवित्तको खराब कर्जा अनुपात सामान्य घटेर ४.७८ प्रतिशतमा झर्दा प्रतिशेयर नेटवर्थ १७८.७९ रुपैयाँ, कोषको लागत ७.३३ प्रतिशत र मूल्य आम्दानी अनुपात १२.४४ गुणा छ ।

?  समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ  ।